Քիչ առաջ ԼՂ տեղեկատվական պաշտոնական էջերից իմացանք, որ ԼՂ իշխանությունները ընդունել են ռուսական խաղաղապահ զորակազմի հրամանատարության առաջարկությունը կրակի դադարեցման վերաբերյալ: Սա վերաբերում է երեկ կեսօրից Ադրբեջանի կողմից մեկնարկած հարձակման արդյունքում բռնկված ռազմական գործողություններին:

Այս մասին ֆեյսբուքյան ուղիղ եթերի ժամանակ ասաց ՀՀ վարչապետ Նիկոլ Փաշինյանը:

«Մենք ծանոթացանք տեքստին, և քանի որ ՀՀ-ն այդ տեքստի ձևավորմանը որևէ կերպ չի մասնակցել և քննարկումների կողմ չի եղել, առաջին նկատառումը հետևյալն է, որ տեքստում խոսվում է ԼՂ-ից ՀՀ զինված ուժերի մնացած ստորաբաժանումների մասին: Այս փաստը մեզ համար այնքան էլ հասկանալի չէ, այն պայմաններում, երբ բազմիցս ասել ենք, որ 2021 թվականի օգոստոսից ՀՀ-ն ԼՂ-ում բանակ չունի, բայց ամեն դեպքում մենք այս հայտարարությունը և ԼՂ իշխանությունների կողմից նրա ընդունումը ընդունում ենք ի գիտություն:

Հաջորդ խնդիրը, որին ուզում եմ անդրադառնալ, ԼՂ հայության անվտանգության հարցն է, և տրամաբանորեն ենթադրվում է, որ եթե խաղաղապահները նման առաջարկություն են արել, դա ինքնին նշանակում է, որ նրանք ամբողջությամբ և այլևս առանց վերապահումների ընդունել են ԼՂ հայության անվտանգության ապահովման ամբողջական պարտավորությունը, ինչով պիտի լիարժեք պայմաններ ապահովեն, որպեսզի ԼՂ հայերի իրավունքը պահպանեն իրենց տներում, իրենց հողի վրա ապրելու և ապրելու արժանապատիվ և անվտանգ: Իմ ընկալումն այն է, որ այս հայտարարությամբ նաև այդ պատասխանատվությունն է ամբողջապես ստանձնում, չնայած մենք միշտ էլ այդ կարծիքին էինք, որ այդ պատասխանատվությունը 2020 թվականի նոյեմեբերի 9-ի եռակողմ հայտարարությամբ ըստ էության դրված է ՌԴ խաղաղապահ առաքելության վրա: Բայց մենք հույս ունենք, որ նման քայլ անելով՝ ՌԴ խաղաղապահ զորախումբը ամբողջությամբ կկատարի իր պարտականությունները, ինչի հետ կապված նախորդ շրջանում ունեցել ենք նաև որոշակի վերապահումներ:

Իմ արձագանքն այն է, որ ՀՀ-ի հետ ըստ էության կապ չունեցող տեքստում ՀՀ անունը հիշատակելը արդարացնում է երեկվա իմ այն վարկածը, որ ԼՂ-ի դեմ հարձակման նպատակներից մեկը ՀՀ-ին ներքաշելն է ռազմական գործողությունների մեջ, և իհարկե ինձ համար գնահատականը մեկն է, որ եթե հնարավոր լիներ ՀՀ-ին ներքաշել ռազմական գործողությունների մեջ, դրա խորքային թիրախը պետք է լիներ ՀՀ անկախությունը և ինքնիշխանությունը: Այս առումով իմ գնահատականը նաև այսօրվա իրադարձությունների համատեքստում գոյության շատ լուրջ իրավունք ունի:

Ամեն դեպքում մենք տեղի ունեցածը ընդունում ենք ի գիտություն և կշարունակենք հետևել զարգացումներին, վերջին տեղեկատվությունը, որ ինձ հաջողվել է ստանալ ԼՂ-ից, հետևյալն է, որ ռազմական գործողությունների ինտեսիվությունը կտրուկ նվազել է, և մենք հույս ունենք, որ ռազմական էսկալացիան չի շարունակվի: Մենք կշարունակենք հետևել իրադարձություններին և եթե լրացուցիչ գնահատական և ասելիք ունենանք այս առումով, իհարկե այդ ասելիքը անպայման կկիսենք ձեզ հետ: Հիմա ամենակարևոր հարցը հետևյալն է, որ ԼՂ հայերի իրենց տներում ապրելու իրավունքը լիարժեք ապահովվի ՌԴ կողմից, և գործնական առումով մենք կհետևենք իրադարձություններին և իհարկե նաև որոշակի մտքերի փոխանակում կունենանք միջազգային գործընկերների հետ այս իրադրության հետ կապված և լրացուցիչ գնահատականներ և ասելիք ունենալու պարագայում այն անպայման կկիսենք ձեզ հետ»,- ասաց վարչապետ Նիկոլ Փաշինյանը: