Ըստ նրա՝ հայկական կողմը, այնուամենայնիվ, ուշադիր է ցանկացած ինֆորմացիայի արտահոսքի դեպքում։

«Իհարկե, մենք պետք է լինենք շատ ուշադիր ցանկացած ինֆորմացիայի արտահոսքերի նկատմամբ, որովհետև եթե մենք օր առաջ ինֆորմացիան չճշտենք և չպլանավորենք դրա հակազդման գործողությունները, կունենանք այնպիսի անակնկալներ, որոնք հակառակորդին կտան առավելություններ:

Այսօր այդպիսին չէ իրավիճակը: Գոնե այն հատվածներում, որտեղ անձամբ ինքս շրջագայել եմ, և այն կատարվող ու ակնկալվող աշխատանքները, որոնց համար մեզ հանգիստ իրողություններ են անհրաժեշտ, լարվածությունից դուրս թեկուզ դիրքային այս փոփոխությունների առկայության պայմաններում մենք մեր առջև դրված խնդիրները պետք է լուծենք և Հայաստանի սահմանները պետք է դարձնենք ոչ միայն ինժեներական առումով անառիկ, այլ դրա պաշտպանության առումով՝ ևս»,- ԱԺ-ում լրագրողների հետ զրույցի ժամանակ հայտարարեց նա։

Լրատվամիջոցներից մեկի հարցին, թե որքանո՞վ է պատրաստ մեր բանակը լայնածավալ գործողությունների՝ հաշվի առնելով վերջին օրերին բանակում զինծառայողների սպանության ու ինքնասպանության դեպքերը, Անդրանիկ Քոչարյանը պատասխանեց.

«Այո, մենք ներսում ունենք չլուծված խնդիրներ: Եթե մենք այսօր ունենք չլուծված խնդիր, վաղը դա չպետք է լինի: Եթե կա երեկ չլուծված խնդիրը, որի լուծումը դեռ իրականությունից հեռու է, ուրեմն մենք մեր աշխատանքի մեջ ինչ-որ տեղ թերացել ենք: Մենք ունենք իրողություն, որը պետք է հաղթահարված լիներ: Դրա համար մեծ ջանքեր են պահանջվում և՛ հրամանատարությունից, և՛ զինվորից, և՛ զինվոր-հրամանատար, բանակ-հասարակություն փոխհարաբերությունից, և՛ նաև լրատվական դաշտի ու զինված ուժերի փոխըմբռնումից: Միայն բանակի ուսերին թողնել այս ծավալուն խնդիրների լուծումը, մեզ ոչ մի տեղ չի հասցնելու»: