Հաջա Լահբիբին անդրադարձավ նաև Հայոց ցեղասպանության հուշահամալիր կատարած իր այցին և նշեց, որ չպետք է մոռանալ պատմությունը և պետք է խուսափել, որ այն կրկնվի։

 

«Մեծագույն բախտ ունենք 30 հազար հայ ունենալու Բելգիայում, բոլորը հպարտ են հայ և բելգիացի լինելու համար։ Առաջարկել ենք դեսպանություն բացել Հայաստանում, սա ցույց կտա, թե ինչ կարևորություն ենք մենք տալիս մեր քաղաքական հարաբերություններին։ Բելգիան աջակցելու և քաջալերելու է այն հակամարտության կարգավորմանը, որը 100 տարի ի վեր լուծում չի գտնում: Մտահոգված է Բելգիան ԼՂ հակամարտության լարվածության կապակցությամբ, միակ ճանապարհը այս պատմական հակամարտությունից դուրս գալու համար բանակցությունների և կոմպրոմիսների ճանապարհն է, նույնիսկ եթե դրանց դժվար է հասնել։ Ես նույնը կասեմ նաև ադրբեջանցի իմ գործընկերոջը»,- ասաց դիվանագետը:

Ըստ նրա՝ 2023 թվականին Շառլ Միշելի միջնորդությամբ կայացած հանդիպումների շրջանակներում պայմանավորվածությունները դրական առաջընթաց են, երկու երկրների ղեկավարները հաստատել են երկրների սուվերենությունն ու տարածքների ամբողջականությունը. «Ես ողջունում եմ ձեր վարչապետի համարձակ հայտարարությունները, որոնք խաղաղության ուղին են բռնել։ Յուրաքանչյուր պետության պարտավորությունն է պահապանել իր բնակչության անվտանգության իրավունքը։ Ես կհիշեցնեմ ադրբեջանցի իմ գործընկերոջը այս մասին»:

 

Վերջինիս խոսքերով՝ ՀՀ-ն և Ադրբեջանը մոտ են խաղաղության համաձայնագրին, և երկու ղեկավարների պարտականությունն է ամեն ինչ անել՝ հայ և ադրբեջանցի ժողովրդին թույլ տալու ապրել խաղաղության մեջ։ Նա տեղեկացրեց, որ նոր խորհրդակցություններ պետք է տեղի ունենան Բրյուսելում, Երևանում և Բաքվում․ «Մենք հուսով ենք, որ դրանք պատմական շրջադարձի կհասնեն, դրան հասնելու համար հույս դրեք Եվրամիության վրա»:

 

Բելգիայի ԱԳ նախարարը կարևորեց ՀՀ որոշումը՝ իր տարածքում ընդունելու ԵՄ դիտորդական առաքելությանը, որի նպատակն է ապահովել կայունություն։

 

Դիվանագետը նաև անդրադարձավ Լաչինի միջանցքի սահմանափակումներին, որը լուրջ հետևանքներ է ունենում և սպառնալիքներ առաջացնում՝ սովամահության և հիվանդությունների առումով․ «Բնակիչների կյանքը վտանգի մեջ է, Բելգիան ընդունում է ԵՄ դիրքորոշումը, և Ադրբեջանի պարտավորությունն է ապահովել ԼՂ բնակչության անվտանգությունը և Լաչինի միջանցքով ազատ տեղաշարժը»։  

 

Աղբյուր՝ armtimes.com