Ժամը 12:00-ից սկսած՝ Ստեփանավանի օդանավակայանում ներկաները ականատես կլինեն մեծ օդային փառատոնի․ երկինքը կզարդարեն տարատեսակ թռչող սարքեր՝ ինքնաթիռներ, պարապլաններ, ուղղաթիռներ, օդապարիկներ և դրոններ։ Միջոցառմանը կներկայացվեն ժամանցային ծրագրեր, իմերսիվ փորձառություններ՝ զուգորդված բենդների և DJ-ների կատարումներով։
Սակայն Air Fest IV Stepanavan-ը միայն հետաքրքիր ժամանցի մասին չէ․ վերջինիս առաջնային նպատակը Հայաստանում փոքր ավիացիայի զարգացմանը նպաստելն է։ Air Fest-ի շրջանակում ոլորտի առաջատարները կկազմակերպեն պանելային քննարկումներ և շնորհանդեսներ։ Նրանք կկիսվեն իրենց փորձով, գիտելիքներով և գաղափարներով Հայաստանում փոքր ավիացիայի հետագա զարգացման վերաբերյալ։
«Armenia Air Fest-ը ավելին է, քան պարզապես միջոցառում, այն ճանապարհորդություն է դեպի փոքր ավիացիայի հետաքրքրաշարժ աշխարհ: Մեր միջոցառումը ցուցադրում է ինքնաթիռների, օդապարիկների, անօդաչու թռչող սարքերի, ավիամոդելների բազմազան տեսականի, և որպես փոքր ավիացիայի զարգացման հարթակ՝ փառատոնը նպատակ ունի ոգեշնչել օդաչուների և ավիացիայի էնտուզիաստների հաջորդ սերնդին և նպաստել մարզպետների, մասնավոր հատվածի և կարծիքի առաջնորդների միջև երկխոսությանը, ինչը պետք է օգնի ոլորտի զարգացմանը»,- նշում են կազմակերպիչները։
Air Fest IV Stepanavan-ը կազմակերպում է Հայաստանի ընդհանուր ավիացիայի հիմնադրամը ՀՀ ԷՆ զբոսաշրջության կոմիտեի և ՀՀ քաղաքացիական ավիացիայի կոմիտեի աջակցությամբ: