2022 թվականի դեկտեմբերի 12-ից, երբ ապօրինաբար արգելափակվեց Լաչինի միջանցքը, անցել է շուրջ ութ ամիս (240 օր): Ներկա պահին, Լեռնային Ղարաբաղի ավելի քան 120 հազար անպաշտպան ազգաբնակչությունը, պարենի ու դեղորայքի, վառելիքի ու էներգետիկ աղբյուրների, հոսանքի և այլն պակասի հետևանքով կանգնած է մարդկային աղետի առջև:

 

Լաչինի միջանցքի վերաբացման և Լեռնային Ղարաբաղի ժողովրդին մարդասիրական օգնությունները շարունակելու ուղղությամբ Հայաստանի պետության անխափան ու շարունակական ջանքերով հանդերձ, Բաքվի իշխանությունները անտեսում են Հաագայի միջազգային դատարանի կողմից 2023 թվականի փետրվարի 22-ին արձակված և 2023-ի հուլիսի 6-ին նույնությամբ վերահաստատված օրինական ու պարտադիր գործադրելի վճիռը, ինչպես և մարդու իրավունքների պաշտպանության ու մարդասիրական միջազգային բոլոր կանոններն ու պայմանագրերը, շարունակում են ոտնձգությունները Արցախի սահմանների դեմ և ապօրինաբար փակված պահում Լաչինի միջանցքը, որը Լեռնային Ղարաբաղի միակ կապող ուղին է Հայաստանի Հանրապետությանը, և այդ միջոցով իսկ բացեիբաց ոտնահարում են Լեռնային Ղարաբաղի ժողովրդի միջազգայնորեն ճանաչված իրավունքները՝ խափանելով նրա ազատությունը, կյանքն ու անվտանգությունը իր հայրենի հողի վրա՝ սովի մատնելով անմեղ մարդկանց:

 

Նկատի ունենալով Լեռնային Ղարաբաղում տիրող խիստ անմարդկային ու ճգնաժամային պայմանները և Բաքվի պետության կողմից դրված արգելքը մարդասիրական նախաձեռնությունների և օգնությունների առջև,  որոնք առաջարկվում են հենց Լաչինի միջանցքում ներկա Կարմիր Խաչի կոմիտեի անդամների, և այլ միջազգային կազմակերպությունների կամ երկրների կողմից, և մյուս կողմից՝ վկան լինելով 120 հազար արցախահայության, ընդ որում 30 հազար մանուկների, 20 հազար ծերերի, 20 հազար հղի կանանց և բժշկական հատուկ խնամքի կարոտ ինը հազար պատերազմական հաշմանդամների շրջափակման հետևանքով սննդամթերքից, անհրաժեշտ դեղորայքից ու բժշկական սարքավորումներից զրկվածությանը, և վերջին օրերին մանուկների ու ծերերի ցավալի մահվան դեպքերին,

Իրանահայ մի խումբ ժողովրդական մարմիններ ու միություններ ի մի են եկել Միասնության Դաշինքի անվան ներքո՝ օգնության հայցով դիմելու Իրանի բարձրաստիճան պաշտոնատարներին ու պատասխանատու անձանց, Թեհրանում ՄԱԿ-ի գրասենյակին, մարդու իրավունքների պաշտպան միջազգային կազմակերպություններին ու ՄԱԿ-ի անդամ երկրներին, որպեսզի նրանք, հիմք ընդունելով Հաագայի Դատարանի վճիռը, պարտավորեցնող բանաձևերով հանդես գան և անհրաժեշտ ճնշման լծակներով Ալիևի իշխանությանը պարտադրեն շտապ վերաբացել Լաչինի միջանցքը և ապահովել Արցախի ազգաբնակչության ազատ ու անվտանգ երթևեկությունը և ապրանքափոխադրումը այդ միջանցքով:

 

Անկասկած, Լաչինի միջանցքի վերաբացման ուղղությամբ Հաագայի Դատարանի վճռի անհապաղ գործադրման գծով Ալիևի իշխանության դեմ կիրառվելիք միջազգային ճնշումների ուշացումն ու հետաձգումը կարող է հանգեցնել մարդկային անփոխարինելի աղետի, որի պատասխանատուն են լինելու Բաքվի իշխանությունները և ՄԱԿ-ի ու մարդասիրական կազմակերպությունների անդամ ողջ երկրները:

 

Միասնության Դաշինքը այսու դիմում է մեր երկրի բարձրաստիճան բոլոր պաշտոնյաներին ու պատասխանատու անձանց, Թեհրանում ՄԱԿ-ի գրասենյակին, Կարմիր Խաչի և Կարմիր Մահիկի գրասենյակներին և խնդրում, որպեսզի, շտապ միջոցներ կիրառելով, գործնական մարդասիրական քայլեր ձեռնարկեն Լեռնային Ղարաբաղի ժողովրդի ներկա աղետալի պայմաններին վերջ տալու  ուղղությամբ, և արտաքին անհրաժեշտ ճնշումների միջոցով առանց նախապայմանների շտապ վերաբացեն Լաչինի կենսական միջանցքը՝ մարդասիրական օգնություններ հասցնելու Լեռնային Ղարաբաղի ժողովրդին:

 

Միասնության Դաշինք