Ըստ կառավարության հաղորդագրության, զրույցի ընթացքում Փաշինյանն ու Ռայիսին քննարկել են ռեգիոնալ իրադրությանը, ինչպես նաև երկկողմ օրակարգին վերաբերող հարցեր, կարևորել են երկկողմ շփումներն ու փոխայցերը: Հայ-իրանական բարձր մակարդակի շփումը անշուշտ շատ կարևոր է, բայց հունիսի 26-ի հեռախոսազրույցը առավել ուշագրավ ու նշանակալի է դառնում դրանից ժամեր առաջ տարածված տեղեկության ֆոնին: Կրեմլը հաղորդագրություն տարածեց, որ տեղի է ունեցել Պուտին-Ռայիսի հեռախոսազրույց, որի առանցքային թեման բնականաբար եղել է Ռուսաստանում իրադրությունը:

Ռայիսին աջակցություն է հայտնել Պուտինի քայլերին: Հատկանշական է, որ Կրեմլի տարածած հաղորդագրությունը պարունակում է երկու առարկայական հիշատակում: Նշվում է, որ անդրադարձ է եղել նաև միջազգային օրակարգի հարցերին, այդ թվում «Անդրկովկասի կայունության ապահովմանը և սիրիական կարգավորմանը»: Նկատենք, Կովկասի առնչությամբ ձևակերպումը չի պարունակում «կարգավորում» սահմանումը, այլ՝ «կայունության ապահովում»: Կովկասի հատուկ հիշատակման ֆոնին էլ ուշադրության է արժանի, որ փաստորեն Պուտին-Ռայիսի զրույցից կարճ ժամանակ անց տեղի է ունենում Փաշինյան-Ռայիսի հեռախոսազրույց:

Ընդ որում, այստեղ էլ թերևս ուշադրության է արժանի այն, որ շեշտվում է երկողմ փոխայցերի և շփումների կարևորությունը, ինչը թերևս թույլ է տալիս ենթադրել, որ քննարկվում է հայ-իրանական բարձրաստիճան որևէ փոխայց, ըստ ամենայնի քննարկման բավականին կոնկրետ օրակարգով, կապված գուցե հենց ռեգիոնալ կայունության ապահովման խնդրի հետ, որ քննարկել են Պուտինն ու Ռայիսին:

1in.am