«Արմենպրես»-ի փոխանցմամբ՝ այս մասին ասվում է ԱՄՆ-ի և Հնդկաստանի կառավարությունների համատեղ հայտարարության մեջ, որն ընդունվել է հունիսի 22-ին Բայդենի և Հնդկաստանի վարչապետ Նարենդրա Մոդիի բանակցությունների արդյունքներով։

«ԱՄՆ-ն և Հնդկաստանը հաստատել են իրենց վճռականությունը՝ դիմակայելու բազմակողմ համակարգը միակողմանիորեն խարխլելու ցանկացած փորձի: Առաջնորդներն ընդգծել են բազմակողմ համակարգն ամրապնդելու և բարեփոխելու անհրաժեշտությունը, որպեսզի այն կարողանա ավելի լավ արտացոլել արդի իրողությունները: Այս համատեքստում երկու կողմերը հավատարիմ են մնում ՄԱԿ-ի բարեփոխման համապարփակ օրակարգին, այդ թվում՝ ՄԱԿ-ի Անվտանգության խորհրդի մշտական ​​և ոչ մշտական ​​անդամների կատեգորիաների ընդլայնման ճանապարհով», - նշվում է փաստաթղթում:

Ինչպես ընդգծվում է հայտարարության մեջ, ԱՄՆ-ի իշխանությունները կարծում են, որ «գլոբալ կառավարումը պետք է ավելի ներառական և ներկայացուցչական լինի»։ Այս կապակցությամբ «նախագահ Բայդենը հաստատել է ԱՄՆ-ի աջակցությունը բարեփոխված ՄԱԿ-ի ԱԽ-ում Հնդկաստանին մշտական ​​անդամի կարգավիճակ տրամադրելուն:

Փաստաթղթում նշվում է նաև, որ Անվտանգության շուրջ Քառակողմ երկխոսության գագաթնաժողովը (Ավստրալիա, Հնդկաստան, ԱՄՆ և Ճապոնիա՝ Quad) «կանցկացվի Հնդկաստանում 2024 թ.-ին և կդառնա երկխոսությունը շարունակելու և համագործակցությունն ամրապնդելու ևս մեկ հնարավորություն»։

ՄԱԿ-ի Անվտանգության խորհուրդը ներկայում ունի հինգ մշտական ​​անդամ՝ Ռուսաստանը, Մեծ Բրիտանիան, Չինաստանը, ԱՄՆ-ն և Ֆրանսիան։ Այս երկրներից յուրաքանչյուրը վետոյի իրավունք ունի խորհրդում։ Խորհրդի 10 մասնակիցները, որոնք ընտրվել են աշխարհագրական սկզբունքով, ունեն ոչ մշտական ​​անդամի կարգավիճակ։