Եռակողմ խորհրդակցություններում պատվիրակությունները գլխավորել են Հայաստանի արտգործնախարարի տեղակալ Մնացական Սաֆարյանը, Իրանի ԱԳՆ Հարավային Ասիայի գլխավոր վարչության պետ Սեյեդ Ռասուլ Մուսավին և Հնդկաստանի ԱԳՆ տարածքային գլխավոր վարչության պետ Ջիտենդեր Պալ Սինգհը:

Հայաստանի արտգործնախարարությունը որոշ մանրամասներ է հրապարակել այդ հանդիպումից. «Հանդիպմանը քննարկվել են տնտեսական, տարածաշրջանային հաղորդակցային ուղիներին առնչվող հարցեր, նախանշվել են մշակութային և միջմարդկային կապերի խորացման և տարբեր ոլորտներում եռակողմ համագործակցության հեռանկարները: Կողմերը պայմանավորվել են շարունակել համագործակցությանը միտված եռակողմ ձևաչափով խորհրդակցությունները»:

Իրանի ու Հնդկաստանի հետ Հայաստանում խոշոր տրանսպորտային նախագծեր իրականացնելու հարցը վերջին մեկ տարում բավականին ակտիվ քննարկվում էր։ Մասնավորապես, խոսվում էր, որ Սյունիքի մարզը կարող կարևոր հանգույց է դառնալ, որը կկապի Չաբահար նավահանգիստը Սև ծովի հետ։

«Սա հատկապես կարևոր է այն տեսանկյունից, որ թե՛ Իրանը, թե՛ Հնդկաստանը ունեն շահագրգռվածություն դրանում, որ նաև Հայաստանով անցնի այդ երթուղին։ Դա է հենց փաստում նաև այս եռակողմ ձևաչափով մեկնարկած հանդիպում-խորհրդակցությունները։ Հետևաբար հիմնական անելիքը, որ այստեղ կա, Հայաստանի վրա է՝ Հյուսիս-Հարավ ավտոմայրուղու կառուցումն է։ Իրանից և Հնդկաստանից կա  քաղաքական աջակցություն և ցանկություն, որ երթուղին անցնի Հայաստանով։ Մնում է՝ Հայաստանն իրականացնի իր անելիքները»,– կարծում է իրանագետ Ժաննա Վարդանյանը։ 

Հնդկական «Յուսանաս հիմնադրամ» կենտրոնի գիտաշխատող Արարատ Կոստանյանը նկատում է, որ Արևմուտքին հասնելու Հնդկաստանի տնտեսական ու քաղաքական ծրագրերում Իրանին ու Հայաստանին կարևորագույն դեր է վերապահված․

 «Դրական է, որ բանակցություններ են սկսվում, և Հայաստանի դերը կարևորվում է նման մեգածրագրերի մեջ, որոնք, բնականաբար, ի շահ Հայաստանի են։ Մենք, առհասարակ, բոլոր նման կողմերի հետ՝ դեպի բազմաբևեռություն արագ զարգացող գերտերությունների հետ, պետք է ակտիվորեն աշխատենք այսպիսի ծրագրերում մեր ներգրավվածությունը դրսևորելու համար»։

Ըստ փորձագետի՝ Չինաստանի միջնորդությամբ Սաուդիան Արաբիայի հետ Իրանի հարաբերությունների կարգավորումից հետո, Իրանի դերը տարածաշրջանում և Մերձավոր Արևելքում ուժեղանում է, ինչը չափազանց դրական է Հայաստանի համար՝ որպես հարևան երկիր։ Այս առումով, Արարատ Կոստանյանի գնահատմամբ, Հայաստանի ներգրավվածությունը կարևոր է նաև անվտանգային տեսանկյունից։

«Բնականաբար, սա ունի անվտանգության բաղադրիչ։ Իրանի դերն այսօր մեր տարածաշրջանում մեծանալու է, որը որպես մեզ բարեկամ, դաշնակից երկիր, ավելի տեսանելի է. ավելի լսելի է լինելու Իրանի դիրքորոշումը»,– շեշտում է Արարատ Կստանյանը։

Անվտանգային հարցերը էական նշանակություն ունեն նաև Հնդկաստանի համար՝ շեշտում է փորձագետը։ Կոստանյանի խոսքով՝ ակնհայտ է, որ ձևավորվող «նոր աշխարհակարգում» կարևոր դեր է ստանձնելու նաև Հնդկաստանը։ Փորձագետները նկատում են, որ նաև հենց այդ տեսանկյունից է կարևորվում Հյուսիս-Հարավ մայրուղին, որը ռազմավարական նշանակություն ունի ոչ միայն Հայաստանի, այլև Իրանի ու Հնդկաստանի համար։

Այս առանցքը բավականին մեծ ներուժ ունի՝ ասում է Իրանագետ Ժաննա Վարդանյանը.

 «Շահագրգռվածությունը երեք կողմերից էլ բավականին մեծ է։ Իրանից անգամ պատրաստակամություն են հայտնում մասնակցելու ավտոմայրուղու կառուցմանը. խոսակցություններ կան, որ Քաջարանի թունելի կառուցմանն են մասնակցելու։ Կարևոր է նաև, որ Հնդկաստանն էլ շահագրգիռ է, որ երթուղին անցնի Հայաստանով։ Հետևաբար, մեր անելիքը մեծ է, պետք է ենթակառուցվածքները կարգի բերել»։  

Փորձագետները վստահ են, որ Հյուսիս-Հարավ մայրուղու գործարկումը մեծ կարևորություն ունի տարածաշրջանի ապագայի համար: Բազմիցս նշվել է, որ այս երթուղին շահավետ կլինի Հնդկաստանի, Իրանի, Հայաստանի և Վրաստանի համար։