Այս մասին այսօր լրագրողների հետ զրույցում ասաց ՀՀ տարածքային կառավարման և ենթակառուցվածքների նախարար Գնել Սանոսյանը:

«Լծեն-Շամբ ճանապարհը շուրջ 6 կմ է, Տաթև-Լծենը՝ 20 կմ: Շամբ-Լծենում 6 կմ-ից 5 կմ-ն ասֆալտապատ է, 1.2 կմ-ը՝ նախապատրաստական փուլում է, առաջիկայում կասֆալտապատենք: Իսկ Տաթև-Լծենի 20 կմ-ից շուրջ 19 կմ-ը ասֆալտապատ է, մյուս հատվածներում խիճը տեղադրված է, բոլոր տեսակի մեքենաների համար անցանելի է»,- մանրամասնեց նախարարը։

Ըստ նրա՝ իրավաբանական գործընթաց կա, որ նոր կառուցվող ճանապարհներին տրվի հանրապետական նշանակության ճանապարհների կարգավիճակ և լինեն սպասարկող ընկերություններ․ «Ճանապարհը նախատեսված է, որ Սիսիան-Գորիս-Կապան ճանապարհն ավելի հեշտ անցնի, Սիսիանից միանգամից դեպի Տաթև գյուղ դուրս կգանք: Իսկ գլխավոր դժվարությունը Տաթևի ոլորաններն էին»:

Այս ճանապարհները, նախարարի խոսքով, հյուսիս-հարավի մաս չեն կազմում, միայն Շամբից դեպի Լծեն մի կարճ հատված համընկնում ունի Սիսիան-Քաջարան հյուսիս-հարավ ճանապարհի հետ։ Նրա խոսքով՝ այս ճանապարհն ավելի շատ նախատեսված է, որ Սիսիան-Գորիս-Կապան ճանապարհն ավելի հեշտ անցնի, և հնարավոր լինի Սիսիանից միանգամից դեպի Տաթև գյուղ դուրս գալ․ «Ճանապարհները խոշոր բեռնատարների համար անցանելի են, գլխավորապես դա ենք հաշվի առել։ Իր կարգով ավելի բարձր է՝ թեքությունները, ոլորապտույտ հատվածների լայնություններն իրենց նորմերով ավելի բարձր են»։

Իսկ «Հյուսիս-հարավ» ճանապարհը, եթե ամեն ինչ անխափան ընթանա, կկառուցվի 5-6 տարվա ընթացքում: «Եթե կարողանանք այս տարի ունենալ շինարարական ընկերություն, 5-6 տարի պետք է, որ կառուցվի: Իրանի հետ էլ բավականին լավ բեռնաառևտրաշրջանառություն ունենք, կարծում ենք, որ այս ճանապարհն այս առումով գործը բավականին կհեշտացնի և կնպաստի երկու երկրների փոխգործակցությանը»,- նկատեց նախարարը: