Շուրջ 40 օր Ադրբեջանը թույլ չի տալիս վերցնել հայ զինվորների մարմինները․ ի՞նչ են անում Կարմիր խաչն ու Մարդու իրավունքներով զբաղվող միջազգային հանրությունը
17 զինվորականի էլ ադրբեջանական կողմը վերադարձրեց, որոնք գերեվարվել էին ռազմական հարձակման ընթացքում։ 29 անհետ կորածների ճակատագիրն անհայտ է։ Նրանք գերեվարված են, թե զոհված՝ հայտնի չէ, բայց հստակ է, որ նրանցից առնվազն մի քանիսի մարմինը գտնվում է Հայաստանի Հանրապետության այն տարածքներում, որոնք ադրբեջանական հարձակումից հետո անցել են վերջիններիս տիրապետության տակ։ Ադրբեջանը թույլ չի տալիս հայ զինծառայողների մարմինները դուրս բերել այդ տարածքներից։
Կարմիր խաչի միջազգային կոմիտեի Հայաստանի գրասենյակի մամուլի քարտուղար Զառա Ամատունին Civic.am-ին ասաց, որ վիճակագրական տվյալներ նրանք չեն հրապարակում։ Թե ինչու Ադրբեջանը թույլ չի տալիս դուրս բերել զոհերի մարմինները, Ամատունին ասաց, որ երկու կողմերի միջև երկխոսության մանրամասները չեն կարող հանրայնացնել։ «Երկխոսությունը շարունակվում է, որպեսզի ցանկացած պահի, երբ կլինի համաձայնեցված ինչ-որ մի ֆորմատ, որի շրջանակում հնարավոր կդառնա կա՛մ արտահանձնել մասունքները, կա՛մ որոնողական աշխատանքներ իրականացնել, մենք պատրաստակամ ենք մեր մասնակցությունն ունենալ, այնպես, ինչպես կողմերը կհամաձայնեն։ Սակայն մենք չենք կարող հիմա հանրայնացնել, թե ինչպես են արձագանքում իշխանությունները այս հարցերին, սրանք հումանիտար հարցեր են։ Մենք կարող ենք ընդամենը աջակցել, միջնորդել, պնդել, հիշեցնել խնդրի մասին, սակայն մարդկանց իրավունքները պաշտպանելը պետության պարտականությունն է, և, ցավոք, մեր գործառույթը միայն աջակցելն ու միջնորդելն է»,- ասաց Զառա Ամատունին։
44-օրյա պատերազմից հետո գերեվարված և դեռ Հայաստանին չվերադարձված գերիների մասով Կարմիր խաչի հայաստանյան գրասենյակի ներկայացուցիչն ասաց, որ շարունակում են տեսակցել գերեվարվածներին։ «Մենք օգնում ենք իրենց կապ պահել իրենց ընտանիքների անդամների հետ։ Վերջին անգամ հոկտեմբերին ենք իրենց տեսակցել, որի շրջանակներում տարբեր կապի միջոցներով օգնել ենք կապ հաստատել ընտանիքի անդամների հետ՝ նամակների, հեռախոսազանգերի միջոցով, տեսագրության միջոցով և այլն»,- ասաց Զառա Ամատունին։
ՄԻՊ-ից էլ մեզ ասացին, որ խնդրով զբաղվում է ԱԱԾ-ն։ Իրենք իրենց ունեցած տվյալները փոխանցում են պատկան մարմիններին, այդ թվում՝ Կարմիր խաչին։ Բացի դրանից, խնդրի մասին տարբեր եղանակներով փորձում են տեղեկացնել, հիշեցնել միջազգային գործընկերներին։