ԵԱՏՄ երկրների հետ ապրանքաշրջանառությունը այս տարվա հունվար-օգոստոս ամիսների ընթացքում հասել է 2,8 մլրդ դոլարի
«Չնայած աշխարհում տիրող քաղաքական և սոցիալ-տնտեսական բարդ իրավիճակին՝ ԵԱՏՄ-ն հետևողականորեն իրացնում է ինտեգրման օրակարգերը և խորացնում մեր երկրների միջև համագործակցությունը»,- ասաց Փաշինյանը։ Վարչապետը արձանագրեց, որ փոխադարձ առևտրի ոլորտում կան հստակ դրական արդյունքներ և դինամիկա։ «Մենք հասել ենք լուրջ հաջողությունների՝ ստեղծվել է տարողունակ ընդհանուր շուկա, նկատելիորեն բարձրացել է փոխադարձ առևտրի ծավալը։ Հայաստանի՝ ԵԱՏՄ երկրների հետ ապրանքաշրջանառությունը այս տարվա հունվար-օգոստոս ամիսների ընթացքում հասել է 2,8 մլրդ դոլարի և անցած տարվա նույն ժամանակահատվածի համեմատ աճել է 74 տոկոսով, դրա հետ մեկտեղ Հայաստանից արտահանումը կրկնապատկվել է, իսկ ներմուծումն աճել 58 տոկոսով»։ Վարչապետը կարևորեց նաև արդյունաբերության դերը, հատկապես բարձր տեխնոլոգիական ոլորտում։ Փաշինյանը ընդգծեց էլեկտրոնային առևտրի դերը, որի բաժինը անընդհատ աճում է։ «ԵԱՏՄ-ում ընդհանուր արդյունաբերական շուկաների ձևավորումը էներգետիկ ոլորտում անհրաժեշտ պայման է տնտեսական ինտեգրման պոտենցիալի իրացման և արդյունաբերական ոլորտի ամբողջական զարգացման համար։ Այդ կոնտեքստում մենք բաց ենք կոնստրուկտիվ քննարկման համար՝ առաջնորդվելով բոլոր անդամ երկրների հետ համաձայնություններ ձեռք բերելու և բոլորի շահը հաշվի առնելու սկզբունքով»։
Փաշինյանը խոսեց նաև գազի ընդհանուր շուկայի ձևավորման անհրաժեշտության մասին, որի իրականացումը, ըստ նրա, անդամ բոլոր երկրներին թույլ կտա օգտվել դրա առավելություններից։ Հակառակ դեպքում ԵԱՏՄ անդամ պետությունները երկկողմ պայմանագրերի ավարտից հետո չեն կարողանա օգտվել գազի ընդհանուր շուկայի առավելություններից։ Փաշինյանը խոսեց նաև կլիմայական խնդիրների մասին՝ նշելով, որ անդամ երկրները կամավոր իրականացնում են մի շարք ծրագրեր արտանետումների կրճատման ուղղությամբ։