ՀՀ ՄԻՊ-ը՝ հայ գյուղացիների դեմ իրականացվող հոգեբանական ճնշումների մասին
Ադրբեջանական կողմը՝ սկսած խոշտանգումների տեսանյութերի մասսայականացման ծավալներից մինչև հայատյացության հայտարարությունների տարածման իր մասշտաբայնություն, հետևողական քաղաքականություն է վարում»,- այսօր՝ հոկտեմբերի 7-ին, մամուլի ասուլիսի ժամանակ ասաց ՀՀ ՄԻՊ Քրիստիննե Գրիգորյանը։
Նրա խոսքով՝ Ադրբեջանը տարբեր սոցիալական ցանցերում ունի հարձակման խմբեր, որոնք հստակ հրահանգներ են կատարում ընդդեմ այն միջազգային դերակատարների, որոնք փաստերով անդրադառնում են իրողություններին. «Մենք ապացույցներ ունենք իրենց ստացած ինստրուկցիաների, թե ում էջերն է պետք հարձակման ենթարկել, որ թվիթներին է պետք արձագանքել, ինչպես արձագանքել և այլն։ Եվ սա ապացուցում է, որ հիբրիդային պատերազմը շատ ռեալ է։ Հենց սեպտեմբերի 13-ին՝ հարձակման օրը, ադրբեջանական իշխող ուժի պատգամավորների կողմից հայկական պետությունը վերացնելու կոչեր են հնչել, որոնք կան մեր զեկույցում»,- ասաց ՀՀ ՄԻՊ-ը։
Քրիստիննե Գրիգորյանն անդրադարձավ նաև Ադրբեջանի զինված ուժերի կողմից Հայաստանի սահմանամերձ որոշ բնակավայրերում՝ մասնավորապես Գեղարքունիքի մարզում իրականացված հոգեբանական ճնշումներին. «Հուլիս-օգոստոս ամիսներին եղել ենք Գեղարքունիքի ու Տավուշի մարզերում։ Գեղարքունիքի հենց այն բնակավայրերում, որտեղ սեպտեմբերին եղավ հարձակումը, արձանագրել ենք, որ ադրբեջանական զինված ուժերը տարբեր ուղղություններով իրենց դիրքերից ուժեղ լույսեր էին միացնում մարդկանց տների պատուհանների ուղղությամբ։ Սա հոգեբանական տեռորի օրինակ էր։ Բարձրադիր դիրքերից անիվներ էին այրում և այդ անիվները բաց թողնում ներքև՝ դեպի գյուղերը՝ այրելով գյուղացիների հավաքած խոտը, իսկ նման վայրերում մարդկանց միակ ապրուստն անասնապահությունն է, հողագործությունն է, կամ գողանում էին անասուններին, կամ բարձրախոսներով սպառնալիքներ էին հնչեցնում դաշտում աշխատող հայ գյուղացիներին ուղղված։ Այս դեպքերը նույնությամբ կրկնվել են տարբեր համայնքներում և մեզ հիմք են տվել պնդելու, որ ադրբեջանական կողմի նպատակն այդ գյուղերի հայաթափումն է։ Եվ սեպտեմբերյան հարձակումը ցույց տվեց, որ իրենց վարքագիծը հող էր նախապատրաստում ագրեսիայի համար»։