Կարևոր հայտարարություններ ԱՄՆ-ում Հայաստանի և Արցախի վերաբերյալ
Սեպտեմբերի 19-ին ՄԱԿ-ի Գլխավոր ասամբլեայի 77-րդ նստաշրջանի շրջանակում ԱՄՆ պետքարտուղար Էնթոնի Բլիկենի միջնորդությամբ տեղի է ունեցել Հայաստանի և Ադրբեջանի ԱԳ նախարարներ Արարատ Միրզոյանի և Ջեյհուն Բայրամովի հանդիպումը։
Պետքարտուղար Էնթոնի Բլինկենն ասել է, որ իրեն ոգևորել է «այն փաստը, որ
բախումները դադարեցվել են, և վերջին օրերին նոր սրացումներ չեն եղել»։
Պետդեպարտամենտի խոսնակ Նեդ Փրայսը նշել է, որ Բլինկենն ընդգծել է խաղաղ
գործընթացին վերադառնալու կարևորությունը և կողմերին հորդորել է կրկին
հանդիպել մինչև ամսվա վերջ։
Մեր պատվիրակությունը վերադառնում է Վաշինգտոն հպարտ և պատրաստ առաջ
մղելու Կոնգրեսի երկարամյա հանձնառությունը ժողովրդավարական Հայաստանի և
Կովկասում անվտանգ ու խաղաղ տարածաշրջանի նկատմամբ: Այս մասին ասված է
Ներկայացուցիչների պալատի նախագահ Նենսի Փելոսիի՝ Երեւան կատարած այցի
արդյունքներով հայտարարության մեջ։
«Կոնգրեսի պատվիրակությունը մեկնեց Հայաստան՝ որպես ժողովրդավարության և
ավտոկրատիայի միջև պայքարի կարևոր ճակատ: Երեւանում մեր հանդիպումների
ժամանակ մենք մեր ամուր աջակցությունն ենք հայտնել Հայաստանի
ժողովրդավարությանն ու անվտանգությանը, հատկապես Հայաստանի դեմ Ադրբեջանի
հարձակումից հետո»,- ասված է հայտարարության մեջ։
Նենսի Փելոսին նշում է, որ իր այցը նախատեսված էր սեպտեմբերի 12-ին
ռազմական գործողությունների մեկնարկից առաջ։ Սոթքում և Ջերմուկում տեղի
ունեցած ագրեսիայի նպատակներից մեկն էլ կարող էր լինել Փելոսիի այցը Երևան
խաթարելը։ Հաշվի առնելով, որ նրա Հայաստան կատարած այցի արդյունքներով
սկսել են խոսել անվտանգության նոր համակարգի մասին, նման հնարավորությունը
իրական է թվում։
Միևնույն ժամանակ, Վաշինգտոնում տեղի ունեցավ «Արցախի անկախության
ողջույնը Կապիտոլիումի բլրի վրա» միջոցառումը, որտեղ ԱՄՆ կոնգրեսականները
կոչ արեցին ճանաչել Արցախի անկախությունը։
Հիմնական զեկուցողն էր Արցախի արտաքին գործերի նախարար Դավիթ Բաբայանը,
ով Արցախի ժողովրդի առջև ծառացած գոյաբանական սպառնալիքների համատեքստում
նշել է Արցախի անկախության ճանաչմամբ Արցախի անվտանգությունն ու ապագան
ապահովելու հրատապ անհրաժեշտությունը։
«ԱՄՆ-ը պետք է դադարեցնի Ադրբեջանին տրամադրվող բոլոր օգնությունները,
ուսումնասիրի պատժամիջոցներ սահմանելու ուղիները և Ադրբեջանի ղեկավարներին
պատասխանատվության ենթարկի ռազմական հանցագործությունների համար», –
միջոցառման ժամանակ հայտարարել է կոնգրեսական Ադամ Շիֆը:
Հիշեցնենք, որ կոնգրեսական Ադամ Շիֆը ԱՄՆ Կոնգրեսի հայկական հարցերով
հանձնաժողովի ղեկավարության հետ միասին Կոնգրես է ներկայացրել
երկկուսակցական օրինագիծ, որը դատապարտում է Հայաստանի և Արցախի վրա
Ադրբեջանի հարձակումները։
«Մենք խստորեն դատապարտում ենք ադրբեջանական զինուժի մահաբեր
հարձակումները Հայաստանի ինքնիշխան տարածքի վրա։ Ադրբեջանական բռնության
այս բացահայտ սրացումը ցույց է տալիս, թե որքան ամբարտավան է դարձել Ալիևի
ռեժիմը, երբ նրա չպատճառաբանված ագրեսիան բախվում է միջազգային հանրության
խուլ լռության և կեղծ երկիմաստություններին, ինչը Ադրբեջանին
հնարավորություն է տալիս շարունակելու և ընդլայնելու իր հարձակումները: Կոչ
ենք անում Բայդենի վարչակազմին և Պետդեպարտամենտին միանշանակ դատապարտել
Ադրբեջանի գործողությունները և անհապաղ դադարեցնել բոլոր օգնությունները
Ալիևի ռեժիմին»,- ասվում է կոնգրեսականների հայտարարության մեջ։
Կոնգրեսի հայկական հարցերով հանձնախմբի համանախագահ Ֆրենկ Փալոնը, ով
խոսնակ Նենսի Փելոսիի հետ այցելել է Հայաստան, ասաց, որ իրենց այցի կարևոր
մասն էր հասկացնել տալը, որ «Հայաստանը անկախ է լինելու, իսկ Արցախը դրա մի
մասն է»:
Նմանատիպ Լուրեր
ԱՄՆ ևս 14 նահանգ հետևել է Կոլորադոյի օրինակին և արգելել Թրամփին մասնակցելու ԱՄՆ նախագահի ընտրություններին
Նախօրեին հայտնի է դարձել, որ Կոլորադոյի Գերագույն դատարանն արգելել է Դոնալդ Թրամփին մասնակցել փրայմերիզներին։
«Աշխատանքները նախ կսկսվեն Հայաստանի հետ»․ Իրան-ԵԱՏՄ ազատ առևտրի համաձայնագրի ստորագրումը՝ օրեր անց
Դեկտեմբերի 25-ին կստորագրվի Իրան-ԵԱՏՄ ազատ առևտրի համաձայնագիրը։ Իրանական կողմի փոխանցմամբ՝ արտոնությունների հետ կապված աշխատանքները նախ կսկսվեն Հայաստանի հետ։ Փոխադարձ առևտրում մաքսատուրքից կազատվեն ՀՀ–ից Իրան արտահանման առաջնային հետաքրություն ներկայացնող ապրանքները։
Եթե ռումբերը չոչնչացնեն Գազայի հատվածի բնակչությանը, սովն ու հիվանդությունները կանեն․ «Բժիշկներ առանց սահմանների» կազմակերպություն
«Բժիշկներ առանց սահմանների» միջազգային մարդասիրական կազմակերպությունը դատապարտել է Գազայի հատվածում «միջազգային մարդասիրական իրավունքի կոպտագույն խախտումը», Իսպանիայում հայտարարել է հասարակական կազմակերպության գլխավոր տնօրեն Մարտա Կանյասը։
ԱՄՆ-ն ընդլայնել է ռուսական ընկերությունների դեմ պատժամիջոցները
ԱՄՆ-ն ընդլայնել է պատժամիջոցները ռուսական չորս ընկերությունների և նավթամթերք տեղափոխող տանկերի նկատմամբ:
ԱՄՆ-Թուրքիա հարաբերությունները դժգոհություն են առաջացրել հունական կողմում
Հունաստան-Ամերիկա առաջնորդության խորհրդի գործադիր տնօրեն Էնդի Զեմենդիեսը թուրք-հունական հարաբերություններում նկատվող դրական դինամիկայի ֆոնին բողոք պարունակող նամակ է ուղարկել ԱՄՆ-ի պետքարտուղարություն։
Մակրոնը միգրացիայի մասին աղմկահարույց օրենքն ուղարկում է Սահմանադրական խորհուրդ
Ֆրանսիայի Ազգային ժողովի (խորհրդարանի ստորին պալատ) կողմից դեկտեմբերի 19-ին ընդունված ներգաղթի կանոնները խստացնելու մասին օրինագիծը նախագահ Էմանուել Մակրոնի որոշմամբ կներկայացվի Սահմանադրական խորհրդի հաստատմանը։ «Արմենպրես»-ի փոխանցմամբ՝ այս մասին նախարարների խորհրդի նիստից հետո ճեպազրույցում ասել է նախարարների կաբինետի պաշտոնական ներկայացուցիչ Օլիվյե Վերանը։
