«Սուրմալու»-ի ողբերգությունը շահարկող Գեղամ Մանուկյանին և նրա գործընկերներին կարելի է դասել «մահաբաղձ» ու «մահասուն» քաղգործիչների շարքին, որոնք իրենց ասելիքը սնում են այլոց մահվան հաշվին
ՀՀ վարչապետ Նիկոլ Փաշինյանի որոշմամբ՝ 2022-ի օգոստոսի 17-18-ը ներառյալ հայտարարվել է սուգ՝ «Սուրմալու» առևտրի կենտրոնում տեղի ունեցած պայթյունի կապակցությամբ: Սգո օրերին, «Հայաստանի Հանրապետության դրոշի մասին» օրենքի 4-րդ հոդվածի համաձայն, Հայաստանի Հանրապետության դրոշը իջեցվում է մինչև դրոշաձողի մեջտեղը: Դրոշի վերևի մասում ամրացվում է սև ժապավեն, որի երկարությունը հավասարեցվում է դրոշի երկարությանը: «Հեռուստատեսության և ռադիոյի մասին» օրենքի 22-րդ հոդվածի համաձայն՝ պետության կողմից հայտարարված սգո օրերին գովազդի և զվարճալի հաղորդումների հեռարձակումը հեռուստառադիոընկերությունների կողմից արգելվում է:
Նշենք, որ ողբերգական պայթյունի հաջորդ օրը լրագրողների հետ ճեպազրույցում, ի պատասխան հարցի՝ հնարավո՞ր է սուգ հայտարարվի, ՏԿԵ նախարար գնել Սանոսյանը նշել էր, որ «քննարկվում է» նման հարց։
Ինչպես և սպասվում էր, ողբերգական պայթյունն ու նույնիսկ սգո օրեր հայտարարելու վարչապետի որոշումը քաղաքական շահարկումների նյութ դարձան ընդդիմության որոշ ներկայացուցիչների համար։ Մասնավորապես ՀՅԴ-ական Գեղամ Մանուկյանը ֆեյսբուքյան գրառմամբ գուժեց՝ «Սրանք անգամ չեն կարողանում սուգ հայտարարել»՝ պնդելով, թե «հանրային ճնշումից հետո» Փաշինյանը «ստիպված ՀՀ տարածքում սուգ» հայտարարեց։ Մանուկյանին այս պահին հուզող միակ դարդն ու ցավը, պարզվում է, վարչապետի որոշման «անկատարությունն է»՝ դրանում նշված չէ, թե «պրոտոկոլով» ինչ է նախատեսված անել սգո օրերին։ «Մի խելքը գլխին մարդ չկա՞ր այդ կառավարությունում, որ հուշեր՝ պետք է հավելվեին մի քանի կետեր, որ սուգն էլ լիներ պատշաճ կերպով։ Թող սովորեին այլ պետությունների ղեկավարներից, ...կամ գոնե արտագրեին նախկինում Նիկոլի ստորագրած երկու որոշումներից»՝ մասնավորապես գրում է «սգագետ» Մանուկյանը։
Գեղամ Մանուկյանին և ՀՀ քաղաքացիների շրջանում արձանագրված մահվան դեպքերը շահարկող նրա մյուս գործընկերներին կարելի է հանգիստ խղճով դասել «մահաբաղձ» ու «մահասուն» քաղգործիչների շարքին, գործիչներ, որոնք իրենց քաղաքական ասելիքը սնում են այլոց մահվան հաշվին և, փաստորեն, սնվում են մահերով։
Նշենք, որ Մանուկյանի գրառմանը նախորդել էր նրա մեկ այլ գործընկերոջ՝ ՀՀԿ-ական Արմեն Աշոտյանի գրառումը՝ «Որոնողական-փրկարարական աշխատանքներն ավարտելուն պես Հայաստանում պետք է սգո օր հայտարարել: Սա է պահանջում տարրական բարոյականությունն ու հասարակական համերաշխությունը»: Աշոտյանի գրառմամբ կիսվել էր նաև մեկ այլ ՀՀԿ-ական՝ Էդուարդ Շարմազանովը՝ կից գրելով, թե համաձայն է իր կուսընկերոջ հետ։ Սուգ հայտարարելու «հանրային ճնշում» ասելով Գեղամ Մանուկյանը հավանաբար նկատի ունի ընդդիմադիր իր գործընկերների ֆեյսբուքյան սույն գրառումները և մեկ էլ ՍԴ աշխատակազմի նախկին ղեկավար Է․ Ղազարյանի՝ մեկը մեկից նողկալի մենախոսությունները ողբերգության թեմայով։ Վերջինս, ի դեպ, սուգ հայտարարելու մասին վարչապետի որոշման վերաբերյալ ԶԼՄ-ներից մեկի հրապարակման տակ գրել է. «Քանի Հայաստանում վարչապետը Նիկոլ Փաշինյանն է, ամեն օր էլ սուգ է։ Նոր որոշման կարիք չկա»։