Ինչ կապ ունի՝ Իշխան Սաղաթելյանն է, թե Սաղաթել Իշխանյանը, մարդը եթե աշխատանքի չի գնում, պետք է ազատվի. քաղաքագետ
Ընդդիմությունը խաբել է իր ընտրողներին և հարկատուներին նույնպես խաբում է: Չեն գալիս աշխատանքի, ասում են՝ սեպտեմբերից էլ չենք գալու, բայց գումար են աշխատում: Չեն գալիս աշխատանքի, մանդատներից կզրկվեն, հետո ինչ ուզում են կանեն:
Դիտարկմանը՝ այսօր ԱԺ նախագահ Ալեն Սիմոնյանը հայտարարել է, որ ընդդիմադիր պատգամավորներին մանդատից զրկելու հարցով քննարկում եղել է, սակայն կարծիքները կիսվել են, Մեհրաբյանը նշում է՝ թող ՔՊ-ն որոշի, թե ինչ մարտավարություն է ընդունում:
«Սակայն գոյություն ունի օրենք: Մարդը, եթե աշխատանքի չի գնում, ի՞նչ է լինում. ազատում են աշխատանքից: Հիմա ինչ կապ ունի՝ այդ մարդը Իշխան Սաղաթելյա՞նն է, թե՞ Սաղաթել Իշխանյանը: Կապ չունի՝ պաշտոնյա, թե հասարակ աշխատակից: Չեմ կարող հասկանալ ընդդիմադիր պատգամավորներին մանդատից զրկելուն դեմ եղած պատգամավորների դիրքորոշումը»,- ասում է նա:
Մեհրաբյանը նկատում է՝ ընդդիմադիրները աշխատանքի չեն գնում, բայց հանրահավաքներ էլ չեն անում: Քաղաքագետը կարծում է՝ վախենում են արևահարվելուց. «Իրենք իրենց վրա գերեզմանաքար քաշեցին, տարբերություն չկա, թե էլ ինչ կանեն»:
Անդրադառնալով «Պատիվ ունեմ» խմբակցության նախկին ղեկավար Արթուր Վանեցյանի մանդատը վայր դնելուն՝ զրուցակիցը ասում է՝ այսպես, թե այնպես Վանեցյանը ոչինչ չէր անում խորհրդարանում. նրա մանդատը վայր դնելը ոչինչ չի տալիս ոչ մեկին:
«Վանեցյանի հեռանալու շարժառիթներով չեմ հետաքրքրվել: Դա քաղաքական գործընթացների վրա ընդհանրապես չի ազդելու. ըընդամենը անձնական հարաբերություններ էին: «Հայրենիք» կուսակցության և ՀՀԿ-ի միջև ոչ մի գաղափարախոսություն չկար, կար միայն խմբային շահ: Իսկ դա հանրության հետաքրքրության շրջանակում այլևս չի տեղավորվում»,- նկատում է քաղաքագետը և հավելում՝ նույնը «Հայաստան» խմբակցությանն է վերաբերում:
Հարցադրմանը՝ նկատի ունի՝ քաղաքացիներին այլևս չե՞ն հետաքրքրվում քաղաքական անցուդարձով, վերջինս ասում է՝ ոչ թե քաղաքական անցուդարձից են հոգնել, այլ այս ընդդիմադիրների անպատասխանատու պահվածքից:
«Հասարակությունը շահագրգռված է այս անճաշակ բեմականացման վերջը տեսնել: Վերջն էլ խորհրդարանական ընդդիմության վտարումն է լինելու քաղաքական դաշտից, քանի որ մարդիկ ակնկալում են արդյունավետ աշխատանք, ինչը չեն տեսնում: Հաջորդ ընտրություններին կերևա, թե նրանց փոխարեն ովքեր կգան»,- նշում է նա:
Հարցին՝ կարծում է արտահերթ ընտրություննե՞ր են լինելու, ոչ թե հերթական, Մեհրաբյանը դրական պատասխան է տալիս. «Ակնկալում եմ հերթական ընտրությունների ժամկետին չենք հասնի: Մեզ պետք են նոր Սահմանադրություն և նոր ընտրություններ: Նոր ընտրությունների դեպքում, վստահ եմ, այսօրվա խորհրդարանական ընդդիմությունն այլևս չի լինի խորհրդարանում: Կարող են լինել նոր ուժեր, որոնք դեռ չեն ձևավորվել, սակայն կարող են միանալ արդեն գոյություն ունեցող ուժերից որոշները»:
armtimes.com