ԵԱՀԿ Մինսկի խմբի վերածնունդը բխում է Հայաստանի շահերից. Ռոբերտ Ղևոնդյան
«Հայաստանի և Ադրբեջանի արտգործնախարարների հանդիպման վերաբերյալ նախապես տեղեկություն չկար, ինչը բավականին անսպասելի էր, քանի որ հանդիպումներից առաջ հատկապես ադրբեջանական կողմը փորձում էր ինֆորմացիոն դաշտը լցնել տեղեկությամբ և շահեր քաղել, իսկ այս անգամ այդպես չեղավ, ինչը, հավանաբար, կապված է հանդիպմանը կարճ ժամանակահատվածում նախապատրաստվելու հետ»,- Yerevanlur-ի հետ զրույցում հայտարարեց քաղաքագետ Ռոբերտ Ղևոնդյանը՝ անդրադառնալով Փարիզում կայացած Միրզոյան-Բայրամով հանդիպմանը։
Քաղաքագետի կարծիքով՝ համանախագահող երկիր Ֆրանսիայի հովանու ներքո քննարկվել են ընթացիկ հարցեր, սակայն տեղեկատվության սակավաթիվ լինելու պատճառով՝ դժվար է ասել, թե ինչ հետևանքներ կլինեն հանդիպումից հետո։
«Հանդիպումը, հավանաբար, կարող է կապված լինել Ռուսաստանի կողմից նշված երկրների ղեկավարների առաջիկա հանդիպման հետ․ դա պետք է նախապատրաստվեր արտգործնախարարների միջև օրակարգերի ճշգրտման ճանապարհով։ Մյուս կարևոր հանգամանքն այն է, որ հանդիպումն անցկացվել է ԵԱՀԿ Մինսկի խմբի համանախագահներից մյուսի հովանու ներքո, ինչը նշանակում է, որ հետագայում ենթադրվող ղեկավարների հանդիպումը ևս կունենա ԵԱՀԿ-ի հովանու ներքո անցկացվող որոշակի կարգավիճակ, և եթե նույնիսկ չունենա էլ, ապա լավ կլինի, որ Հայաստանը փորձի այդպիսի կարգավիճակ հաղորդել, քանի որ դա մեր շահերից է բխում»,-ընդգծեց Ղևոնդյանը։
Ըստ նրա՝ ԵԱՀԿ Մինսկի խմբի վերածնունդը բխում է Հայաստանի շահերից, և պետք է ամեն ինչ անել, որ այն հնարավորինս շուտ տեղի ունենա․«Այստեղ մենք բավականին բարենպաստ վիճակում ենք գտնվում, որովհետև բացառությամբ Թուրքիայի՝ ԵԱՀԿ Մինսկի խմբի մյուս անդամները և ոչ Մինսկի խմբի հիմնական քաղաքակրթական կենտրոնները համակարծիք են, որ վերջնական խաղաղության համար անհրաժեշտ է այդ ֆորմատում համաձայնության գալ։ Այստեղ քննարկվող հարցերը պետք է համապատասխանեն Հայաստանի շահերին, իսկ թե այս հանդիպումը դրա հնարավորությունը տալիս է, թե ոչ, ես նշեցի, որ տալիս է այնքանով, որ կարելի է այն օգտագործել հետագայում ղեկավարների հանդիպումանը ևս նման կարգավիճակ հաղորդելու համար»։
Նմանատիպ Լուրեր
