Հանրահավաքների մասնակիցների թիվը բավարար չէ կրիտիկական զանգված համարելու համար. քաղաքագետ
«Ընդդիմության ցույցերի կոնկրետ նպատակը Արցախի փրկությունը չէ, այլ իշխանություն կազմող քաղաքական ուժի նկատմամբ վարկանիշի դրական տարբերություն գրանցելն ու իշխանության գալը, իսկ Արցախն այստեղ ընդամենը առիթ է, որը փողոցում գտնվող քաղաքական ուժը կարողանում է այս պահին օգտագործել»,- Araratnews.am-ի հետ զրույցում ասաց քաղաքագետ Ռոբերտ Ղեւոնդյանը` անդրադառնալով ընդդիմության իրականացրած ցույցերի «նպատակներին»:
Քաղաքագետը նկատում է` սա խաղ է իշխանության համար. «Ցանկացած խնդիր, որտեղ հնարավոր կլինի իշխանության սխալները մատնացույց անել եւ դրա հաշվին վարկանիշ հավաքել` նրանք դա օգտագործում են եւ մշտապես շահարկելու են, ուստի անելու են ամենը՝ իշխանությանը վնաս տալու համար, դե եղանակների տաքացումն էլ վերջնական հնարավորություն տվեց այն իրականացնել»:
Ընդդիմադիրների երեկվա պահվածքն էլ, երբ վարչապետի հայտարարությունից հետո նրանք լքեցին ԱԺ դահլիճը, քաղաքագետը որակեց «փախուստ իրականությունից». «Ընդդիմադիրների այդ քայլը իրականությունից փախուստ էր: Նրանք այդկերպ փորձեցին որոշակի սադրանքներ հրահրել, բայց ժողովրդական լեզվով ասած` «մնացին այդ սադրանքների տակ», քանի որ թույլ չտվեցին վարչապետը հայտարարի այն, ինչը, վերջինիս ներկայացմամբ` ձեռնտու չէր իրենց։ Այսինքն, ուղիղ հակառակը ստացվեց` այն օրակարագը, որով նրանք առաջնորդվում էին, չծառայեց իր նպատակին»:
Ղեւոնդյանը փաստեց` փողոցում գտնվող քաղաքական ուժի կարեւորագույն նպատակն այժմ աժիոտաժ ստեղծելն է` լինի քաղաքակիրթ եղանակով, թե՛ խուլիգանությամբ. «Առաջինի դեպքում լսարանային պարապմունքներից դուրս հիմնականում ԵՊՀ-ի որոշ դասախոսներ դասախոսություն են կարդում, իսկ խուլիգանության տարբեր դրսեւորումների նպատակը հասարակության մոտ հետաքրքրություն առաջացնելն է, քանի որ հասարակությանը ցանկացած սկանդալային եւ ֆորմայից դուրս վարքագիծ հետաքրքրում է»:
Քաղաքագետը վստահեցնում է` եթե անգամ ընդդիմության հանրահավաքների մասնակիցների թիվը 5000-6000 կազմի, միեւնույն է` մարդկանց այդ քանակը բավարար չէ՝ կրիտիկական զանգված համարելու համար. «Իշխանափոխության մասին չեմ էլ խոսում, բայց որոշակի աջակցություն հավաքելուց հետո գոնե ինչ-որ որոշումներ կայացնելու հարցում հաշվի կառնեին իրենց ցանկությունները»:
Ղեւոնդյանի դիտարկմամբ` ընդդիմության հանրահավաքների սակավության պատճառը ՀՀ քաղաքացիների այդ կոնտինգենտին մերժելն է, սակայն այստեղ վճռորոշ է իշխանությունների աշխատելաոճը` եթե իշխանությունն իր դերն ամբողջությամբ կատարի, ապա վստահորեն նրանք հաջողության չեն հասնի:
Աննա ՉԻԲՈՒԽՉՅԱՆ
Աղբյուր՝ araratnews.am