Ռուսաստանի և Ուկրաինայի պատվիրակություններն այսօր Ստամբուլում բանակցությունների նոր փուլ կանցկացնեն։ Կողմերը դեմ առ դեմ կհանդիպեն մարտի 7-ին Բելառուսի Բրեստի մարզում կայացած բանակցություններից հետո առաջին անգամ։
Պատվիրակությունների աշխատանքն այս ընթացքում ընթացել է տեսակոնֆերանսի ձևաչափով։ Ինչպես հաղորդել է ռուսական պատվիրակության ղեկավար, նախագահի օգնական Վլադիմիր Մեդինսկին, փորձագիտական խմբերը քննարկումներ են անցկացրել գրեթե ամեն օր, իսկ պատվիրակությունների ղեկավարները բանակցություններ են վարել շաբաթը երկու-երեք անգամ։ Աշխատանքը շարունակվել է նաև գիշերը. իրավաբանները, զինվորականները, փորձագետները համեմատել են դիրքորոշումները և փոխզիջումներ փնտրել։
Թուրքիան երկրորդ անգամ է միջնորդի դերում ռուս-ուկրաինական բանակցություններում. Մարտի 10-ին Անթալիայում դիվանագիտական ֆորումի շրջանակում թուրքական կողմը կազմակերպել էր Ռուսաստանի և Ուկրաինայի արտգործնախարարներ Սերգեյ Լավրովի և Դմիտրի Կուլեբայի հանդիպումը՝ Թուրքիայի արտգործնախարար Մևլութ Չավուշօղլուի մասնակցությամբ։ Բանակցությունները հաջողություն չունեցան, սակայն Անկարան շարունակում է կողմերի դիրքորոշումները մոտեցնելու փորձերը։
Ստամբուլում հանդիպման նախաձեռնողը Թուրքիայի նախագահ Թայիփ Էրդողանն է։ Թուրքիայի նախագահի գրասենյակի փոխանցմամբ՝ պայմանավորվածությունը ձեռք է բերվել ՌԴ նախագահ Վլադիմիր Պուտինի և Թուրքիայի ղեկավարի հեռախոսազրույցի ընթացքում։ «Նախագահ Էրդողանը ընդգծել է Ռուսաստանի և Ուկրաինայի միջև որքան հնարավոր է շուտ զինադադար և խաղաղություն հաստատելու, ինչպես նաև տարածաշրջանում հումանիտար իրավիճակի բարելավման անհրաժեշտությունը», — զրույցից հետո հայտնել են գրասենյակից։
Անկարան նաև համառորեն առաջարկում է հանդիպում կազմակերպել Պուտինի և Ուկրաինայի նախագահ Վլադիմիր Զելենսկու միջև։ Սակայն, ինչպես Մոսկվան բազմիցս ընդգծել է, նման հանդիպում հնարավոր կլինի միայն այն բանից հետո, երբ կողմերը համաձայնեցնեն պայմանագրի տեքստը։
Ստամբուլի բանակցությունները տեղի կունենան Բոսֆորի ափին գտնվող Դոլմաբահչե պալատում՝ օսմանյան սուլթանների վերջին նստավայրում։ Այժմ այստեղ է նախագահի աշխատակազմի աշխատանքային գրասենյակը։ Պալատը հաճախ դառնում է բարձր մակարդակի միջազգային բանակցությունների հարթակ։
Ռուսաստանի և Ուկրաինայի պատվիրակությունները Ստամբուլ են ժամանել նախօրեին։ Էրդողանի խոսքով՝ մինչ երկկողմ բանակցությունները տեղի կունենա կարճ եռակողմ հանդիպում։ Բանակցությունները, ինչպես և Բելառուսի նախորդ դեմ առ դեմ ռաունդները, կանցկացվեն մամուլի համար փակ դռների հետևում։
Աղբյուր՝ armradio.am