Հայ-ֆրանսիական նոր մեկնարկ Փարիզում
Մարտի 9-ին տեղի է ունենում վարչապետ Նիկոլ Փաշինյանի աշխատանքային այցը Ֆրանսիա: Հայ-ֆրանսիական հարաբերությունը մշտապես մեր ուշադրության կենտրոնում է և դրա կարևորության մասին ևս մեկ անգամ խոսելը մի կողմից թվում է ավելորդ, մյուս կողմից՝ անհրաժեշտ:
Անհրաժեշտ այն իմաստով, որ Հայաստանի և Ֆրանսիայի հարաբերությունն ունի որակապես նոր մակարդակի բարձրանալու անհրաժեշտություն և այն տարբեր աստիճանով իհարկե, սակայն կա երկու կողմի համար էլ: Դրա վկայությունն է այն, որ Ֆրանսիայի նախագահը հայտարարել է հայ-ֆրանսիական բազմապրոֆիլ և բազմաոլորտ գործակցության համաժողովի, հարթակի ձևավորման մասին, խոսելով երկարաժամկետ կառուցվածքային նախաձեռնությունների անհրաժեշտության վերաբերյալ:
Մարտի 9-ին փաստացի տրվում է այդ հարթակի մեկնարկը և շատ կարևոր է, որպեսզի այն վերածվի հայ-ֆրանսիական իրական աշխատանքային միջավայրի, որտեղ գաղափարները թե խմորվում են, թե անցնում գործնական փուլ: Սա ունի նաև էական քաղաքական նշանակություն: Ավելին, այսօր, ժամանակակից փոթորկվող և արագ փոփոխվող աշխարհում հենց այդտեղ և զգալիորեն դրանով է ձևավորվում քաղաքական հարաբերության իրական, առարկայական նշանակությունն ու իմաստը: Այն պետք է լինի պաթոսից և պատրանքից զերծ, առանց չափազանցված սպասումների և ամպագոռգոռ արտահայտությունների, միաժամանակ լեցուն լինի իրատեսական բազմաթիվ և բազմազան հնարավորությունները ամենայն բծախնդրությամբ և հետևողականությամբ իրականացնելու կամքով:
Թե Հայաստանի, թե Ֆրանսիայի կառավարությունները պետք է նաև համարժեք ազդակներ հղեն հանրություններին, հանրային ակտիվ ու նախաձեռնող խմբերի փնտրտուքով, որոնք կլինեն նոր հնարավորությունները կապիտալիզացնելու թե գլխավոր շահառուները, թե միջոցը: Հայ-ֆրանսիական հարաբերությունը նոր ձևաչափի,նոր հարթակի բերելու կարևոր նախաձեռնությունն առավելագույնս արագ պետք է աչքի ընկնի գործնականության նոր էֆեկտով, հանրությունների համար իր կենսունակության հարցում դառնալով համոզիչ ու գրավիչ:
Աղբյուր՝ 1in.am