Միավորված ազգերի կազմակերպության Գլխավոր ասամբլեան ձայների մեծամասնությամբ բանաձև է ընդունել, որտեղ Ռուսաստանից պահանջել է դադարեցնել ուժի կիրառումը Ուկրաինայում և դուրս բերել զորքերն այդ երկրի տարածքից։ Այս մասին նշվում է նաև ՄԱԿ-ի թվիթերյան միկրոբլոգում։
In historic "Uniting for Peace" session, #UNGA adopts resolution demanding that the Russian Federation immediately cease its use of force against Ukraine and withdraw its military forces. https://t.co/xWc4QO8ruV pic.twitter.com/NZ5xG7Cfu2
— United Nations (@UN) March 2, 2022
«ՄԱԿ-ի գլխավոր ասամբլեան պահանջել է, որ ՌԴ-ն անհապաղ դադարեցնի Ուկրաինայի դեմ ուժի կիրառումը, անմիջապես, ամբողջությամբ և անվերապահորեն իր բոլոր զինված ուժերը դուրս բերի (Ուկրաինայի) միջազգայնորեն ճանաչված սահմաններով տարածքից»,- նշվում է հաղորդագրության մեջ։
Բանաձևին կողմ է քվեարկել 141 պետություն, դեմ՝ 5, իսկ ձեռնպահ՝ 35-ը։ Դեմ քվեարկած երկրներն են՝ Ռուսաստանը, Բելառուսը, Հյուսիսային Կորեան, Սիրիան և Էրիթրեան։
Հայաստանը ձեռնպահ քվեարկած երկրների շարքում է։ Նախկինում, երբ ՄԱԿ-ում քննարկվում էր ուկրաինական ճգնաժամին վերաբերող որևէ հարց, Հայաստանը մշտապես քվեարկում էր այնպես, ինչպես Ռուսաստանը։
Հետաքրքրական է, որ ձեռնպահ մնացած երկրների թվում են նաև Կուբան, Չինաստանը, Ղազախստանը, Իրանը, որոնք ՄԱԿ-ի տարբեր քվեարկությունների ժամանակ ռուսամետ քվեարկություն էին անում։ Իսկ, օրինակ, Սերբիան, որի նախագահը Ուկրաինայում պատերազմական գործողությունների սկզբում հայտարարել էր, որ պատժամիջոցներ չի սահմանի Ռուսաստանի դեմ, կողմ է քվեարկել։ Չնայած, Սերբիայի նախագահ Ալեքսանդր Վուչիչը հայտարարել էր, որ աջակցում է Ուկրաինայի տարածքային ամբողջականությանը։
Նախկին խորհրդային տարածաշրջանից ձեռնպահ են մնացել նաև Ղազախստանը, Ղրղզստանը, Տաջիկստանը։ Ավելի վաղ, Ուկրաինան Վրաստանից և Ղրղզստանից հետ էր կանչել իր դեսպաններին։ Եթե Վրաստանի պարագայում պատճառը Ռուսաստանի նկատմամբ պատժամիջոցներ սահմանելուց հրաժարվելն ու Ուկրաինային օգնություն տեղափոխող ինքնաթիռին իր օդային սահման չթողնելն էր, ապա Ղրղզստանի պարագայում այդ երկրի նախագահ Սադիր Ժապարովն անուղղակիորեն սատարել էր Ռուսաստանի ներխուժումը Ուկրաինա՝ նշելով, որ «ռուսական մտահոգություններն անհիմն չեն»։
Բանաձևի հեղինակները Մոսկվայից պահանջել են նաև հրաժարվել Դոնեցկի և Լուգանսկի ինքնահռչակ ժողովրդական հանրապետությունների ճանաչումից և բոլոր կողմերին կոչ արել հետևել Մինսկի համաձայնություններին։
Ըստ ՄԱԿ-ի կանոնակարգի՝ Գլխավոր ասամբլեայի բանաձևերը չեն կարող հարկադրանքի միջոց կիրառել պետության նկատմամբ։ Այդպիսի լիազորություններ ունի միայն ՄԱԿ-ի անվտանգության խորհուրդը։
Փետրվարի 26-ին ՄԱԿ-ի գլխավոր քարտուղար Անտոնիու Գուտերիշը հայտարարել էր, որ ձախողվել է ՄԱԿ-ի փորձը՝ կանխարգելելու ռազմական գործողությունը, սակայն խնդրել «խաղաղությանը տալ ևս մեկ հնարավորություն»։ Նույն օրը ՄԱԿ-ի անվտանգության խորհուրդը պատրաստել էր բանաձևի նախագիծ, որը Մոսկվայից պահանջում էր «Ուկրաինայում դադարեցնել հատուկ ռազմական գործողությունը»։ Ռուսաստանը վետո կիրառեց այդ բանաձևի վրա։
Աղբյուր՝ hetq.am
Նմանատիպ Լուրեր
