Կովկասի վրա ուկրաինական պատերազմի ազդեցությանն առնչվող հարցերի համատեքստում առանցքայիններից մեկը բնականաբար այն է, թե ինչ ճակատագիր կարող է սպասել Եվրամիության Արևելյան գործընկերության ծրագրին, որի Վեհաժողովը նախորդ տարի դեկտեմբերի 14-ին տեղի ունեցավ Բրյուսելում: Այդ ծրագիրը Հայաստանի համար ունի կարևոր նշանակություն նաև այն պատճառով, որ նախորդ տարի հայտարարվեց մոտ 2,5 միլիարդ դոլարի հնգամյա ֆինանսական աջակցության փաթեթի մտադրության մասին ու Եվրոպայի կենտրոնում այսօր ծավալվող ռուս-ուկրաինական պատերազմը առաջացնում է հարցեր, թե նոր իրավիճակը ինչպես կազդի ԱԳ կովկասյան քաղաքականության վրա, ինչպիսին կլինի դրա հանդեպ ՌԴ վերաբերմունքը: Այդ առումով այսօր հնչել է հայտարարություն, որը թույլ է տալիս նկատել հուսադրող նշան, որ ռուս-ուկրաինական, իսկ ավելի շուտ Արևմուտք-Ռուսաստանի կոշտ դիմակայությունն ու փաստորեն ՌԴ առաջ քաշվող «երկաթյա վարագույրը» Եվրամիության Արևելյան գործընկերության ծրագրի հարցում կլինի «անցանելի»:
ՌԴ նախագահի խոսնակ Պեսկովը պատասխանելով ԵՄ անդամության Ուկրաինայի դիմումի վերաբերյալ հարցին ասել է, որ Եվրամիությունը ռազմա-քաղաքական բլոկ չէ և հետևաբար այդ հարցը Մոսկվան չի դիտարկում անվտանգության այն փաթեթի շրջանակում, որ դրել է ուկրաինական խնդրում Արևմուտքի առաջ: Սա թույլ է տալիս հուսալ, որ Եվրամիության Արևելյան գործընկերության ծրագրի հանդեպ Ռուսաստանը կլինի հանդուրժող, ինչը կապահովի ԵՄ ԱլԳ շրջանակում կովկասյան երկրների, այդ թվում Հայաստանի աշխատանքի համար բավարար միջավայր, իհարկե հասկանալի է քաղաքական լարվածության պայմաններում: Սրանից զատ, Մոսկվան թերևս կարող է այսպես ասած «մտքում» ունենալ որոշակի շահագրգռություն, որպեսզի Հայաստանը պահպանի կայուն հաղորդակցություն Արևմուտքի հետ, ինչը կարող է ոչ միայն օգտակար, այլ նաև անհրաժեշտ լինել Ռուսաստանին՝ պատժամիջոցներից բխող հանրային, տնտեսական լարումը որոշակի լիցքաթափելու համար:
Միաժամանակ հարց է, թե Եվրամիությունն ինքը ինչպիսի վերաբերմունք կունենա Արևելյան գործընկերության ծրագրի հանդեպ, թե խնդիրներ են առաջանում այդ ծրագրում ակնհայտորեն առանցքային դիտվող Ուկրաինայի հարցում: Այստեղ էլ թերևս կովկասյան երեք երկրները, և հատկապես Հայաստանն ու Վրաստանը թերևս պետք է կարողանան մի կողմից Ռուսաստանի մոտ հակազդեցության առիթներ չտալով, մյուս կողմից աշխատեն Եվրամիության մոտ ծրագրի ապագայի հանդեպ հետաքրքրության անկում թույլ չտալու համար:
Աղբյուր՝ 1in.am