Եվրանեսթի նիստերին կմասնակցեն Նիկոլ Փաշինյանն ու Արարատ Միրզոյանը
بՊլանավորվում են հանդիպումներ ՀՀ վարչապետ Ն․ Փաշինյանի և ՀՀ ԱԳ նախարար Ա․ Միրզոյանի հետ, ինչպես նաև Եվրոպական խորհրդարանի արտաքին հարաբերությունների հանձնաժողովի հանդիպումները Քաղաքական հարցերի, մարդու իրավունքների և ժողովրդավարության հանձնաժողովի, Էներգետիկ անվտանգության հանձնաժողովի, Տնտեսական ինտեգրման հանձնաժողովի, ԵՄ-ի հետ իրավական մոտարկման և ԵՄ քաղաքականությունների հետ համապատասխանեցման հանձնաժողովի, Սոցիալական հարցերի, զբաղվածության, կրթության, մշակույթի և քաղաքացիական հասարակության հանձնաժողովների հետ։
Ադրբեջանական լրատվամիջոցները հայտնում են, որ Միլլի Մեջլիսի պատգամավորները կայցելեն Երևան՝ մասնակցելու Եվրանեսթ խորհրդարանական վեհաժողովի հանձնաժողովի նիստերին, որոնք տեղի կունենան փետրվարի 22-ին։
Միջոցառմանը կմասնակցեն պատգամավորներ, Եվրանեսթ ԽՎ-ում Ադրբեջանի պատվիրակության անդամներ Թաիր Միրկիշիլին և Սոլթան Մամեդովը։
Պատգամավորները կհնչեցնեն ադրբեջանական կողմի դիրքորոշումը հանդիպումներում քննարկվելիք հարցերի վերաբերյալ։
Ազգային ժողովից ավելի վաղ հայտնել էին, որ նիստերին կմասնակցեն Արևելյան գործընկերության երկրների խորհրդարանների և Եվրոպական խորհրդարանի պատգամավորներ: Պլանավորվում է Եվրոպական խորհրդարանի, ինչպես նաև Ադրբեջանի, Ուկրաինայի, Վրաստանի խորհրդարանների պատգամավորների այցը Երևան:
Եվրանեսթի Քաղաքական հարցերի, մարդու իրավունքների և ժողովրդավարության հարցերի, Էներգետիկ անվտանգության հարցերի, Տնտեսական ինտեգրման, իրավական մոտարկման և ԵՄ քաղաքականությունների հետ համապատասխանեցման հարցերի, Սոցիալական հարցերի, կրթության, մշակույթի և քաղաքացիական հասարակության հարցերի հանձնաժողովների նիստերը կանցկացվեն փետրվարի 22-ին Երեւանի Կարեն Դեմիրճյանի անվան մարզահամերգային համալիրում: