«Հայաստան» խմբակցության անունը պետք է փոխել, դնել «մուննաթ» խմբակցություն, եթե մուննաթով են ուզում շարժվեն՝ մուննաթը տեղ չունի մեր քաղաքական օրակարգում․ Անդրանիկ Քոչարյան
«Մենք արել ենք առաջին նիստը, արձանագրել ենք Ռոբերտ Քոչարյանի քաղաքական թիմի ինչ-որ անհասկանալի պահվածք, բնականաբար մեզ համար այդ պահվածքը չի կարող խոչընդոտ լինել, մենք շարժվում ենք մեր առջև դրված խնդիրների ձևակերպման դրույթը հաստատելով»,-այդ մասին Civic.am-ի հետ զրույցում ասաց ԱԺ «Քաղաքացիական պայմանագիր» խմբակցության պատգամավոր, 2020 թվականի սեպտեմբերի 27-ին սանձազերծված ռազմական գործողությունների հանգամանքների ուսումնասիրման նպատակով քննիչ հանձնաժողովի նախագահ Անդրանիկ Քոչարյանը։
Նա տեղեկացրեց, որ երկուշաբթի էլի կլինի բաց նիստ, որից հետո բոլոր նիստերը կլինեն փակ, հիմա ներքին աշխատանքային պրոցեսի կազմավորման խնդիրներով են զբաղված։
Անդրանիկ Քոչարյանը տեղեկացրեց, որ հանդիպել է զոհվածների և գերեվարվածների ընտանիքների հետ, աշխատանքները կոորդինացնող ՊՆ-ի գեներալներից մեկի՝ Արթուր Սիմոնյանի հետ, և բնականաբար իրենց հանձնաժողովի աշխատանքներում շատ կարևոր է նրանց մասնակցությունը։
Անդրանիկ Քոչարյանը նաև հավաստիացրեց, որ հանձնաժողովի աշխատանքներին «Հայաստան» դաշինքի չմասնակցելը չի կարող ստվեր գցել իրենց աշխատանքների վրա։
Նա նշեց, որ «Հայաստան» խմբակցությունը եկել է ԱԺ և նրա նպատակը եղել է՝ օր առաջ իշխանությունը զավթել, գրավել, քանի որ Ռոբերտ Քոչարյանը միշտ ասել է պետք է մաշացնեն, դիրքավորվեն, խրամատավորվեն, շիշ նետեն, կռիվ սարքեին, բայց չէին պատկերացնում, որ կռիվ սարքելուց նաև ծեծվում են, դրանից հետո հանդարտվեցին։
«Բայց հիմա իրենք՝ չաշխատելով, ուզում են անընդհատ օրակարգի մեջ մնան, բայց ԱԺ-ն նաև աշխատելու վայր է, ԱԺ-ն խրամատների տեղ չի և մեր երկրի ներսում չի խրամատները, մեր երկրի անվտանգային համակարգում են մեր խրամատները, որից իրենք իրենց ամեն օր դուրս են թողնում և այս հայտարարությամբ էլ իրենք իրենց դուրս թողեցին, հետո փոշմանեցին։ Այսինքն իրենք տուրիստ են, մենք պետք է աշխատենք, իրենք էլ պիտի գան ասեն այ, մենք մուննաթ ունենք ձեր վրա գալու։ Էդ դեպքում «Հայաստան» խմբակցության անունը պետք է փոխել, դնել «մուննաթ» խմբակցություն։ Եթե մուննաթով են ուզում շարժվեն, մուննաթը տեղ չունի մեր քաղաքական օրակարգի մեջ և մենք մեր խնդիրները լուծելու ենք, ինչպես և լուծեցինք 2016 թվականի քառօրյա պատերազմի քննիչ հանձնաժողովի ժամանակ»,-ասաց Անդրանիկ Քոչարյանը։
Լիլիթ Թադևոսյան
civic.am