Հայկական խաչմերուկի գործնական հիմքը
Հյուսիս-հարավ նախագիծը վերափոխում ենք հյուսիս-հարավ, արևելք-արևմուտքի, այսինքն հայկական խաչմերուկի, կառավարության նիստում հայտարարել է վարչապետ Նիկոլ Փաշինյանը:
Հայկական խաչմերուկն իհարկե շատ լավ է, սակայն պետք է նկատել, որ այդօրինակ բնորոշումները առայժմ կրում են դեկլարատիվ բնույթ, իսկ գործնականում այդ բնորոշումները թերևս կապված են բավականին բարդ ու հակասական հեռանկարների հետ: Հետևաբար, պետք է թերևս հուսալ, որ հռետորաբանության մակարդակում բարձրաձայնելով դրանց մասին, գործնական տիրույթում Հայաստանի վարչապետը, կառավարությունն ու քաղաքական մեծամասնությունը գործում են շատ ավելի պարզ տրամաբանությամբ:
Խոսքն այս դեպքում այն մասին է, որ հայտարարելով խաչմերուկների մասին, Հայաստանի կառավարությունն այդուհանդերձ կենտրոնացած աշխատում է մետրերի վրա և տանել Հայաստանն առաջ քայլ առ քայլ: Մասնավորապես, Հայաստանն այսօր ունի մի գերխնդիր՝ առավելագույնս արագ սկսել Հյուսիս-հարավ ավտոճանապարհի հարավային հատվածի՝ Քաջարան-Սիսիան հատվածի շինարարությունը, լինի այն հյուսիս-հարավ, թե խաչմերուկային տրամաբանությամբ: Խոշոր հաշվով, այդ խաչմերուկով գործնականում շահագրգռված է միայն Հայաստանը, իսկ ռեգիոնալ մնացյալ երկրների համար այն չունի հրատապ անհրաժեշտություն: Հետևաբար, հռետորաբանության մակարդակում փորձելով առաջ բերել Հայաստանի մասշտաբային դերակատարմանն ուղղված նոր ձևակերպումներ ու բանաձևեր, այդուհանդերձ շատ կարևոր է աշխատել Հայաստանում ներքին ռեսուրսի, և ներհայկական ռեսուրսի գործնական մոբիլիզացիայի ուղղությամբ:
2022 թվականին ծրագրված է Հայաստան-Սփյուռք համաժողով և այն թերևս պետք է իր բովանդակության գործնականությամբ և առարկայականությամբ զգալիորեն տարբերվի նախորդ համաժողովներից: Ամենևին չթերագնահատելով նախորդ համաժողովների աշխատանքը, հարկ է այդուհանդերձ նկատել, որ դրանք հիմնականում եղել են ճառասացություն, հատկապես այն մարտահրավերների համեմատ, որ ունեցել է Հայաստանը: Հետևաբար, Հայաստան-Սփյուռք փոխհարաբերությունն ունի բովանդակային առարկայականության և գործնական արդյունքի հարցում էական վերափոխման և թերևս անհրաժեշտ է Հայկական խաչմերուկի միտքը կամ գաղափարը գործնականացնել Հայաստանը նախ դարձնելով տարաբնույթ և բազմազան սփյուռքյան համայնքների և շերտերի շահերի հատման կետ, այլ կերպ ասած՝ տարբեր մասշտաբի գործնական նախաձեռնություններով դարձնելով Հայաստանը համահայկական բազմազան շահերի խաչմերուկ:
Հեղինակ՝ ՀԱԿՈԲ ԲԱԴԱԼՅԱՆ
1in.am
Նմանատիպ Լուրեր
