Փաշինյան․ Այս նախագիծը մեծ ռազմավարական նշանակություն ունի մեզ համար
«Դուք գիտեք, թե այս նախագիծը ինչ մեծ ռազմավարական նշանակություն ունի մեզ համար: Մրցույթի իմաստը հետեւյալն է. առաջին փուլում հրավիրում ենք այն կազմակերպություններին, որոնք հայտ են ներկայացնում այդ ճանապարհի շինարարությունն իրականացնելու:
Գիտեք, որ նախագծի արժեքը մի քանի հարյուր մլն դոլար է: Այս մասշտաբի ներդրումային ծրագիր Հայաստանի անկախության պատմության մեջ չի եղել»,- կառավարության այսօրվա` փետրվարի 17-ի նիստում հայտարարեց ՀՀ վարչապետ Նիկոլ Փաշինյանը` անդրադառնալով այսօր հայտարարված «Հյուսիս-հարավ» ավտոճանապարհի Սիսիան-Քաջարան հատվածի նախավորակավորման մրցույթին:
Փաշինյանը նշեց, որ «Հյուսիս-Հարավ» նախագիծը ըստ էության վերաձեւակերպել եւ դարձել է «Հյուսիս-Հարավ-Արեւելք-Արեւմուտք» նախագիծ, նաեւ հույս հայտնեց, որ այն մեծ տեմպերով կիրականանա:
«Սա նշանակում է, որ հայկական խաչմերուկի այդ ճանապարհի ճյուղերից մեկը Հայաստանը կկապի Իրանի հետ, մյուս ճյուղը Ադրբեջանը Հայաստանին եւ հետագայում նաեւ Նախիջեւան ու Թուրքիա: Մենք այս նախագիծը տեղավորում ենք այդ ընդհանուր կոնտեքստում»,- ասաց վարչապետը…
Տարածքային կառավարման և ենթակառուցվածքների նախարար Գնել Սանոսյանը հավելեց, որ հյուսիս-հարավ ավտոճանապարհը լինելով մոտ 560 կմ, ամենաառանցքային հատվածներից մեկն է. «Սա խոշորամասշտաբ ծրագիր է, եւ մենք ամեն ինչ կանենք, որ միջազգային խոշոր ընկերությունները լուրջ հետաքրքրվածություն ունենան»:
«Մենք այս ճանապարհի կառուցմամբ կունենանք 100 կմ ժամ արագությամբ ճանապարհ, որը շուրջ երկու ժամով կկրճատի այդ հատվածների միջև հեռավորությունը, նաև կլինի բարեկարգ, ժամանակակից ստանդարտներին բավարարող անվտանգ ճանապարհ, ինչը, կարծում ենք, և ռազմավարական, տնտեսական առումով շատ կարևոր է։ Վեց տարի ժամկետ է նշվում ծրագրի իրականացման համար։ Ամբողջովին նոր ճանապարհային հատված է, որտեղ կան շուրջ 4․7 կմ կամուրջներ, որոնք ընդհանուր առմամբ 27 կամուրջներ են։ Կան 12 կմ-ից ավելի թունելային հատվածներ, դրանք հինգ թունելներ են, որոնցից մեկը միայն 8․6 կմ երկարություն կունենա»,- ներկայացրեց ՏԿԵ նախարարը։
Նմանատիպ Լուրեր
