Վարազդատ Հարոյանն առաջին խաղն անցկացրեց Իսպանիայի առաջնությունում
Lragir.am
Հայաստանի ֆուտբոլի ազգային թիմի պաշտպան Վարազդատ Հարոյանը նորամուտը տոնեց իսպանական Լա լիգայում:
«Արմենպրես»-ի հաղորդմամբ` Իսպանիայի ֆուտբոլի առաջնության 2021/22 մրցաշրջանի անդրանիկ տուրում «Կադիս»-ը սեփական հարկի տակ հյուրընկալեց «Լևանտե»-ին: Հյուրերին` «Լևանտե»-ի ֆուտբոլիստներին, հաջողվեց խաղի 39-րդ րոպեին առաջ անցնել հաշվի մեջ: Աչքի ընկավ Մորալեսը: «Կադիս»-ը կարողացավ խուսափել պարտությունից հանդիպման ավելացված ժամանակում: Գոլն իր ակտիվում գրանցեց Էսպինոն:
Հայաստանի ֆուտբոլի ազգային թիմից Վարազդատ Հարոյանը «Կադիս»-ի մեկնարկային կազմում էր, սակայն փոխարինվեց 81-րդ րոպեին:
Հաջորդ հանդիպումը «Կադիս»-ը կանցկացնի օգոստոսի 20-ին` մրցելով «Բետիս»-ի հետ:
Հիշեցնենք, որ Վարազդատ Հարոյանն այս ամռանը ղազախական «Աստանայից» է տեղափոխվել «Կադիս», որի հետ նրա պայմանագիրը նախատեսված է մինչև 2023 թվականը: Նա Արաս Օզբիլիսից հետո երկրորդ հայ ֆուտբոլիստն է, որը հանդես կգա Իսպանիայի Լա Լիգայում: Իսպանական ակումբում Հարոյանը հանդես կգա 5 համարի մարզաշապիկով:Կարիերայի ընթացքում 28-ամյա ֆուտբոլիստը հանդես է եկել նաև Երևանի «Փյունիկում» (2009-2019), Իրանի «Փադիդեհում» (2016-2017), Եկատերինբուրգի «Ուրալում» (2017-2020) ու ռուսական «Տամբովում» (2020):