Ռումինիայի Յասի քաղաքում երեկ մեկնարկեց Եվրոպայի կանանց անհատական առաջնությունը, որին մասնակցում են 29 երկրների 117 շախմատիստուհիներ, հայտնում է Հայաստանի Շախմատի ֆեդերացիայի պաշտոնական կայքը։

Մրցաշարի մասնակիցների թվում են 5 գրոսմայստեր, 22 կանանց գրոսմայստեր, 22 միջազգային վարպետ և 17 կանանց միջազգային վարպետ։

Մրցաշարում Հայաստանը ներկայացնում են գրոսմայստեր Էլինա Դանիելյանը, միջազգային վարպետ Լիլիթ Մկրտչյանը, կանանց գրոսմայստերներ Աննա Սարգսյանը և Մարիա Գևորգյանը, կանանց միջազգային վարպետներ Սուսաննա Գաբոյանը և Սիրանուշ Ղուկասյանը և կանանց ՖԻԴԵ-ի վարպետ Մարիամ Մկրտչյանը։

Երեկ կայացել են 2-րդ տուրի պարտիաները: Երկրորդ անընդմեջ հաղթանակն է տոնել Հայաստանի հավաքականի անդամ Աննա Սարգսյանը՝ պարտության մատնելով Տատիանա Դորնբուշին:

Երկրորդ հաղթանակն է տոնել նաև Հայաստանի հավաքականի առաջին համար Էլինա Դանիելյանը: Վերջինս ծնկի է բերել ադրբեջանցի Զեինաբ Մամեդյարովային:

Առաջին տուրում հաղթանակի հասած Լիլիթ Մկրտչյանը այս տուրում միավորը կիսել է Ուլվիա Ֆատալիևայի հետ:

Առաջին տուրում պարտություններ կրած Մարիա Գևորգյանը, Սիրանուշ Ղուկասյանն ու Մարիամ Մկրտչյան այս տուրում հաղթանակի են հասել՝ համապատասխանաբար Ալեքսանդրա Տարասենկայի, Պետրոնելա-Ալեքսանդրա Պարասչիվի ու Աննա Ագրեստի նկատմամբ:

Սուսաննա Գաբոյանը, որն առաջին տուրում ոչ-ոքի էր խաղացել, այս տուրում պարտվել է Նատալիա Բուկսային:

Armsport.am