Հայազդ- Թվականիս հունիսի 5-ին «Միասնության Դաշինք»-ի գործադիր կազմի նախաձեռնությամբ և նույն դաշինքի ԹՀԹ ՊԺ-ի 17-րդ շրջանի ընտրություններին մասնակցող բոլոր թեկնածուների ներկայությամբ, Թեհրանի հայահոծ «Սասուն» քաղաքամասում գտնվող ՀՄՄ «Րաֆֆի» համալիրում տեղի ունեցավ նախաընտրական ժողովրդական հանդիպում՝ համագումար։

Միջոցառմանը ներկա էին հոծ թվով բազմություն, իրանահայ համայնքի տարբեր խավերի և միությունների ներկայացուցիչներ։

Միջոցառման սկզբում բացման խոսքով հանդես եկավ ՀՄՀՖ-ի վարչության անդամ Սիփան Մկրտումյանը, ով ներկաներին ներկայացրեց Միասնության Դաշինքի համահավաքի հայտագիրը։ Այնուհետև ամբիոն հրավիրեց «Միասնության Դաշինք»-ի օրվա դիվանին բաղկացած՝ Ճրտգ․ Հենրիկ Տեր Ղուկասյան, Զարիկ Ավոյան, Սահակ Շահմուրադյան, Դոկտ․ Անդրանիկ Սիմոնյան և Դոկտ․ Ռուբիկ Սարդարյան։

Դիվանի նախագահ Ճրտգ․ Հենրիկ Տեր Ղուկասյանը պաշտոնապես բացված համարեց համագումարը և դիվանի կողմից շնորհակալություն հայտնեց ներկաներին, մեր համայնքի ազգային և հասարակական կյանքում խիստ նշանակալից և կարևորություն ունեցող ԹՀԹ Պատգամավորական Ժողովի 17-րդ շրջանի նախընտրական քարոզարշավի առիթով կազմակերպված միջոցառմանը հասարակության և Միասնության Դաշինքի թեկնածուների ներկայության կապակցությամբ։     

Այնուհետև ամբիոն հրավիրվեց «Հայազդ» լրատվական կայքի խմբագիր Սահակ Շահմուրդյանը, ով ընթերցեց ԹՀԹ Պատգամավորական Ժողովի 17-րդ շրջանի ընտրություններին մասնակցելու նպատակով «Միասնության Դաշինք»-ի կողմից պատրաստված գործադրական ծրագիրը։

Միջոցառմանը հաջորդեց «Միասնության Դաշինք»-ի թեկնածու Տկն․ Վերժիկ Թահմասյանի ելույթը, ով վերլուծեց Թեհրանի հայ համայնքի կրթական օջախներում և հայկական դպրոցներում հայեցի դաստիարակության և հայերեն լեզվի դասավանդման առկա իրավիճակը և ծրագրային լուծումներ ներկայացրեց հայկական դպրոցներում ազգային և կրոնական դաստիարակության մակարդակը բարձրացնելու և դպրոցների կրթական և հայերեն դասագրքերի բարելավման ուղղությամբ անհրաժեշտ աշխատանքներ կատարելու ուղղությամբ։

Այնուհետև ամբիոն հրավիրվեց «Միասնության Դաշինք»-ի թեկնածու Պրն․ Էդմոն Բեջանյանը։ Իր ելույթում Պրն․ Բեջանյանն անդրադարձավ իրանահայ համայնքի հոգևոր և կրոնական դաստիարակության կարևոր դերակատարությանը հասարակության բարոյական և քրիստոնեական գիտակցության ձևավորման և հավատքի բարձրացման կարևորությանը և ընդգծեց Հայոց Առաքելական Ս․ եկեղեցու մեծ առաքելությունը քրիստոնյա համայնքում սեր ու հավատքի և ազգային միասնականության գաղափարի պահպանման գործում։

Միջոցառման հաջորդ բաժնում հանդես եկավ «Միասնության Դաշինք»-ի թեկնածու Տկն․ Մարո Այվազյանը, ով ներկայացրեց Թեհրանի Հայոց Թեմի կանոնագրությունը և ազգային իշխանության ներկա վարչակառավարման կառուցվածքը։

Այնուհետև այս բաժնի ավարտական ելույթով հանդես եկավ «Միասնության Դաշինք»-ի նախագահ և ՊԺ-ի ընտրությունների թեկնածու՝ ազգային բարերար և գործարար Ճրտգ․ Հենրիկ Տեր Ղուկասյանը։ Նա իր ելույթում մանրակրկիտ անդրադարձավ իրանահայ համայնքում և մասնավորաբար թեհրանահայ  համայնքում տիրող ոչ այնքան բարենպաստ պայմաններին և համայնքի բոլոր դերակատար հասարակական ուժերին կոչ արեց հանուն իրանահայ համայնքի ազգային, հասարակական, կրոնական և տնտեսական իրավիճակի բարելավման և հզոր ու առաջատար համայնք կազմակերպելու և մեր իրավիճակը երկրի մակարդակով բարելավելու նպատակով ձեռք ձեռքի տված և համախմբված աշխատանքով համայնքի բոլոր մարդկային և ֆինանսական ռեսուրսները օգտագործել իրանահայ համայնքի զարգացման և բարգավաճման ուղղությամբ։ Նա նաև կոչ արեց հանուն «Միասնության Դաշինք»-ի ներկայացրած գործադրական ծրագրի համախմբվել այս դաշինքի շուրջ և միասնաբար ու միակամորեն մասնակցել ԹՀԹ Պատգամավորական Ժողովի 17-րդ շրջանի ընտրությունների քվեարկությանը։

Միջոցառման երկրորդ հատվածում օրվա դիվանը հերթականությամբ բեմ հրավիրեց Թեհրանի հայ համայնքի Զեյթուն, Սասուն և կենտրոն քաղաքամասերից  «Միասնության Դաշինք»-ի կազմում ՊԺ-ի ընտրությունների թեկնածուներին։ Յուրաքանչյուր թեկնածու հակիրճ ներկայացրեց իր կենսագրությունը, ազգային և հասարակական կամ միութենական գործունեությունը և ընտրվելու դեպքում ՊԺ-ում որպես ներկայացուցիչ ի շահ մեր համայնքի իր նպատակադրած ծրագիրը։

Այնուհետև դիվանի կողմից առիթ տրվեց ներկաներին իրենց հարցրերը և տեսակետները հայտնելու համագումարին։

Հանդիպման ավարտին գեղեցիկ և հայրենասիրական ասմունքով հանդես եկավ երիտասարդ ասմունքող Սիփան Մկրտումյանը, որը մեծ խանդավառություն և դրական լիցք հաղորդեց ներկաներին։ Համագումարը ավարտվեց հաճելի շփումներով և հյուրընկալությամբ։ Ներկաները սրահը թողեցին ջերմ տպավորությամբ ու դեպի ապագան հույսի ու վստահության տրամադրությամբ։