Հայ և արգենտինացի խորհրդարանականները համատեղ հայտարարությամբ կարևորել են Լաչինի միջանցքով ազատ տեղաշարժի վերականգնումը
Հայտարարության մեջ մասնավորապես նշված է․ «Հայ և արգենտինացի օրենսդիրները, հանդիսանալով համապատասխան բարեկամական խմբերի անդամներ, արգենտինացի օրենսդիրների՝ Հայաստանի Հանրապետություն կատարած առաջին այցի շրջանակում Երևանում կայացած հանդիպումների արդյունքում ցանկություն են արտահայտում խթանել օրենսդրական, հատկապես՝ խորհրդարանական դիվանագիտությանն առնչվող աշխատանքները՝ հետևյալ հիմնական դրույթների հիման վրա՝ մարդու իրավունքների հանդեպ հարգանքի, Ժողովրդավարական համակարգերի ամրապնդման, միջազգային վեճերի խաղաղ լուծման, ագրեսիայի բացառման սկզբունքի, միջազգային խաղաղություն և անվտանգության, երկկողմ տնտեսական գործունեության խթանման, մշակութային կապերի ամրապնդման։ Այդ նպատակով և վեճերի լուծման հարցում ևս մեկ անգամ հանդես գալով երկխոսության և դիվանագիտության դիրքերից՝ ընդգծում են հումանիտար ճգնաժամի խորացումից խուսափելու նպատակով Լաչինի միջանցքով ազատ տեղաշարժի վերականգնման կարևորությունը, ինչպես նաև՝ 2020 թվականի ողբերգական ռազմական գործողություններից հետո որպես ռազմագերիներ պահվող անձանց շուտափույթ ազատ արձակումը»: Աղբյուր՝ armtimes.com