Հենրի Քիսինջերը թեեւ չի արդարացնում Ռուսաստանի ներխուժումն Ուկրաինա, սակայն իրադարձությունների շարքը, որոնք հանգեցրին պատերազմին, ըստ ԱՄՆ նախկին պետքարտուղարի, սկսվեցին Ուկրաինային դաշինք ընդունելու հնարավորության մասին ՆԱՏՕ-ի անդամների առաջին քննարկումից հետո։ Քիսինջերն ասել է, որ թեեւ պատերազմն ինքնին շատ անողոք բան է, հարձակումը պետք է հետ մղվի, եւ ինքն աջակցում է ուկրաինական եւ արեւմտյան դիմադրությանը, այդուհանդերձ, ըստ նրա, դրա համար ամբողջ մեղքը չպետք է բարդել միայն Պուտինի վրա:

«Դեռ 2014-ին իմ հոդվածներից մեկում լուրջ կասկածներ էի հայտնել Ուկրաինային ՆԱՏՕ-ի անդամ հրավիրելու ծրագրի վերաբերյալ: Սրանով սկսվեցին մի շարք իրադարձություններ, որոնք ավարտվեցին պատերազմով: Սա չի արդարացնում պատերազմը, բայց ես այն ժամանակ կարծում էի եւ հիմա էլ կարծում եմ, որ անխոհեմ կլինի, եթե Արեւելյան բլոկի բոլոր նախկին երկրները դառնան ՆԱՏՕ-ի անդամ՝ հետն էլ Ուկրաինային հրավիրել միանալու ՆԱՏՕ-ին»,- ասել է Քիսինջերը՝ հիշեցնելով, որ այնուհետեւ ինքն առաջարկել է Ուկրաինային օժտել չեզոք կարգավիճակով՝ այն դարձնելով «կամուրջ երկու կողմերի միջեւ»:

Նախկին պետքարտուղարն ասել է, որ պատերազմի ավարտից հետո Ուկրաինային անշուշտ պետք է ընդունել Հյուսիսատլանտյան դաշինք։ «Հիմա, երբ ՆԱՏՕ-ի եւ Ռուսաստանի միջեւ այլեւս չեզոք գոտիներ չկան, ավելի ճիշտ կլինի, որ Արեւմուտքն Ուկրաինային ընդունի ՆԱՏՕ-ի կազմում: Դա երաշխիք կդառնա, որ հակամարտությունները, որոնք կարող են նորից ծագել պատերազմի ավարտից հետո կամ խաղաղության համաձայնագրի արդյունքում, Ռուսաստանի կամ Ուկրաինայի միակողմանի հարձակումներով չեն լուծվի»,- պարզաբանել է Քիսինջերը։

 

Աղբյուր՝ aliqmedia.am