«Խաղաղության պայմանագիրը հիմա քննարկվում է»:

 

Այս մասին այսօր ԱԺ-ում՝ լրագրողների հետ զրույցում, ասաց ԱԺ փոխխոսնակ Հակոբ Արշակյանը՝ պատասխանելով հարցին, թե եթե Բաքուն չհամաձայնի Ստեփանակերտի հետ միջազգային տեսանելի մեխանիզմով նստել սեղանի շուրջ, Հայաստանը կստորագրի՞ խաղաղության պայմանագիրը:

 

 

«Եթե անդրադառնանք դետալներին, այս պահին ես չունեմ այդ հնարավորությունը, այդ բանակցային փաստաթղթի ուղիղ քննարկողը չեմ, կա Արտգործնախարարություն, վարչապետ, Անվտանգության խորհուրդ, այնուամենայնիվ, հայկական մոտեցումը դա է, որ միջազգային մեխանիզմ պիտի ստեղծվի»,- նշեց Արշակյանը և դիմելով լրագրողներին՝ ասաց. «Ես կարող եմ հարցը վերաձևակերպել՝ հնարավո՞ր է՝ արդյոք խաղաղության պայմանագիր չստորագրվի, այո, հնարավոր է այդպիսի սցենար, հնարավո՞ր է, որ լինի նոր պատերազմ, կարող եմ ասել՝ հնարավոր է, որովհետև մեր տարածաշրջանում այնպիսի իրավիճակ է, որ շատ նուրբ են բոլոր գծերը»:

Արշակյանը շեշտեց, որ այդ մեխանիզմը պիտի ստեղծվի, և հիմա էլ կա:

«Նոյեմբերի 9-ի փաստաթղթով կա որոշակի անվտանգության երաշխիք, որը կարող է որոշ տեղերում լավ է գործում, որոշ տեղերում՝ ոչ: Խաղաղապահներ կան, Լաչինի միջանցքը արգելափակվել է, կա միջազգային դատարանի որոշում, կա հասցեատեր, այդ մեխանիզմը հիմա կա: Եթե մենք ինչ-որ բան ասում ենք, պիտի դրա հետևից գնանք, իսկ մենք դրա հետևից գնացե՞լ ենք՝ որպես Հայաստանի Հանրապետություն: Եթե դու ինչ-որ բանի հետևից չես գնում, նշանակում է՝ հակառակն ես անում: Միակ դեպքը, որտեղ հիշում եմ, որ այդ փաստաթղթերի հետևից կոնկրետ տեքստով գնացող է եղել, եղել է «Արցախը Հայաստան է և վերջ» արտահայտությունը»,- հիշեցրեց ԱԺ փոխխոսնակը:

Վերջինս նկատեց՝ ՀՀ իշխանությունները խոսում են իրենց անունից, ներկայացնում Հայաստանի դիրքորոշումը. «Մենք չենք ներկայացնում Արցախի դիրքորոշումը: Ես լսել եմ Արցախի նախագահի հայտարարությունը, այնտեղ հստակ դիրքորոշում կար, որ մենք պատրաստ ենք խոսել Բաքվի հետ այն հարցերի շուրջ, որոնք վերաբերում են Արցախի ժողովրդի իրավունքներին ու անվտանգությանը, և կարծում եմ, որ մոտեցումը կարևոր է, ու այդպես էլ պիտի լինի»:

Հակոբ Արշակյանն ընդգծեց՝ անհնար է խոսել անվտանգային համակարգի մասին, առանց կոնկրետության, թե ո՞րն է քո տարածքային ամբողջականությունը:

 

«Որովհետև երբ գտնվում ես հակամարտության գոտում, որտեղ զենքի ուժն է խոսում, միակ մեխանիզմը, որով հնարավոր է ՀՀ ինքնիշխանությունն ու տարածքային ամբողջականությունը պահպանել, բալանսի վերականգնումն ու իրավական համակարգի ամբողջացումն է, որը որ հիմա տեղի է ունենում: Այստեղ ապրելու և արարելու տեսանկյունից այդ կոնկրետությունը մեզ անհրաժեշտ է»,- վստահեցրեց նա:

 

Աղբյուր՝ armtimes.com