Այս մասին «Հայկական ժամանակ»-ի հետ զրույցում ասում է ԵԿՄ հիմնադիր անդամ, «Կոռնիձոր» ջոկատի հրամանատար Արա Խուդավերդյանը (Կոռնիձորի Արո)՝ անդրադառնալով Ադրբեջանի կողմից Սոթքի ուղղությամբ հարձակմանը և հայկական կողմի համարժեք պատասխանին:

Ըստ նրա՝ Ադրբեջանի այսօրինակ դրսևորումները միշտ են եղել, երբ ՀՀ վարչապետը մեկնել է Ռուսաստան տարաբնույթ ժողովների և վեհաժողովների, ՀԱՊԿ-ի շրջանակներում քննարկումների:

«Սոթքում տեղի ունեցած մարտական գործողությունների արդյունքում հասկացանք մի բան՝ գնալով շտկվեց մեր բանակի թե՛ մտավոր, թե՛ հոգևոր, թե՛ կոտրված մեջքը: Տղաները դուրս եկան պարտվածի հոգեբանությունից և պատրաստ վիճակով պաշտպանեցին հայոց սահմանները»:

Արա Խուդավերդյանի կարծիքով՝ այս ամենը և՛ բանակի բարեփոխումների, և՛ պետության վարած արտաքին քաղաքականության, և՛ ՀՀ վարչապետի՝ իր խոսքը պնդելու արդյունքն է:

«Մենք այս քննությունը շատ լավ հանձնեցինք, սրանք մեզ բերելու են մեծ նվաճումներ: Եվ եթե նաև ջարդենք ներքին թշնամուն՝ «5-րդ շարասյանը», լրատվամիջոցներին, որոնք ամեն կերպ աշխատում են իրազեկել հակառակորդին, որպեսզի Հայոց պետականությունը անկման բերեն, ապա Ադրբեջանը սեփական մատը սեփական հետույքից չի կարող հանել»,- ասում է նա:

Կրկին անդրադառնալով բանակում տարվող բարեփոխումներին՝ վերջինս նկատում է՝ ամեն մի պատերազմական և մարտական գործողություններից հետո պարտադիր են փոփոխությունները:

«Բարեփոխումներն ու նորամուծությունները բերում են նոր տեմպ, մտածելակերպ, մոտեցումներ և հետագա հաղթանակին տանող ուրվագիծ: Իսկ եթե բանակը թողնում ես լճացած, ռուսական «Пока не будет звонок из Москвы, мы ничего не будем делать» մոտեցումներով, և հարց է, թե Մոսկվայից ի՞նչ զանգ կգա, այդ կարգի բանակով և լճացած զինվորականներով միայն կարելի է կործանել երկիրը»,- ընդգծում է նա և հավելում, որ մեր զինվորն այսօր բարոյահոգեբանական շատ լավ վիճակում է. «Իրեն օդում արծիվ է զգում, գետնի վրա՝ առյուծ: Ճիշտ է, ունենք հնուց եկած պրոցեսներ, որոնք որոշակի շտկումների կարիք ունեն: Այդ պրոցեսները աստիճանաբար մաշեցնելուց հետո մեր բանակը երկու ոտքի վրա ամուր կկանգնի, և մենք կկարողանանք ոչ միայն մատ թափ տալ հակառակորդի վրա, այլ ստիպել, որ մտնի այնտեղ, որտեղից դուրս է եկել»:

Հարցին, թե առաջիկայում հնարավո՞ր է՝ լայնամասշտաբ ռազմական գործողություններ սկսեն, զրուցակիցն ասում է. «Ադրբեջանը մի պետություն է, որ նրա ո՛չ «հա»-ին է պետք հավատալ, ո՛չ՝ «չէ»-ին. «Նույնն էլ Ռուսաստանի և Թուրքիայի դեպքում է, քանի որ իրենք ունեն գերպետական և գերֆինանսական համատեղ շահեր: Մենք պետք է կարողանանք մեզ միշտ սթափ պահել՝ մտածելով մեր պետության սահմանները պաշտպանելու շահերից: Փա՜ռք մեր բանակին, փա՜ռք մեր զինվորին: Կուզեմ, որ «յան» ազգանունով ներքին թշնամին մառան մտնի ու սկսվի այնքան ժամանակ, քանի դեռ Հայաստանը չի դարձել նվաճող ամբողջ աշխարհում»:

Աղբյուր՝ araratnews.am