Վազգեն Սարգսյանի անվան Հանրապետական մարզադաշտում կայացած խաղի մեկնարկից 10 րոպե անց Հայաստանի հավաքականն առաջ անցավ հաշվի մեջ. Կամո Հովհաննիսյանի փոխանցումից հետո թուրքերից ինքնագոլի հեղինակ դարձավ Օզան Կաբակը:

Բաց թողած գնդակից հետո թուրքերը հնարավորությունը բաց չէին թողնում գրոհելու, սակայն Հայաստանի ընտրանին ակտիվ էր և հստակ հակագրոհում էր: Խաղակեսի միջնամասում վնասվածքի պատճառով Տարոն Ոսկանյանը փոխարինվեց: Նրա փոխարեն հանդիպումը շարունակեց Ստյոպա Մկրտչյանը: Խաղի 34-րդ րոպեին Թուրքիան հավասարեցրեց հանդիպման հաշիվը. դիպուկ հարվածով աչքի ընկավ Օրկուն Կոկչուն:

 

Երկրորդ կեսի մեկնարկում թիմերը փոխանակվում էին գրոհներով` փորձելով գտնել առավել խոցելի օղակները: Առաջին կեսում փոխարինման մտած Ստյոպա Մկրտչյանը երկրորդ կեսում փոխարինվեց․ այս անգամ խաղադաշտ մտավ Խորեն Բայրամյանը:

 

Հանդիպման 63-րդ րոպեին Հայաստանի հավաքականի պաշտպանների սխալից օգտվեց և թուրքերին առաջ մղեց  Քերեմ Ակտուրկոգլուն: Հայաստան-Թուրքիա ֆուտբոլային խաղը Երևանում ավարտվեց 1։2 հաշվով։

Մարտի 28-ին Հայաստանի ընտրանին ընկերական խաղ կանցկացնի Կիպրոսի հավաքականի հետ: Այդ հանդիպումը կկայանա Վազգեն Սարգսյանի անվան Հանրապետական մարզադաշտում, մեկնարկը՝ ժամը 19:00-ին:

 

Աղբյուր՝ armenpress.am