Վստահ եմ՝ Փաշինյանի մեղադրանքը ՀԱՊԿ-ին տեղին է, անգամ՝ մեղմ. ՀՀ-ին օգնելը Կրեմլի հերթական մանիպուլյացիան է. Միսկարյան
Հիշեցնենք՝ ՀԱՊԿ գլխավոր քարտուղար Ստանիսլավ Զասը օրերս բելառուսական ОНТ հեռուստաալիքին տված հարցազրույցում հայտարարել էր, որ ՀԱՊԿ-ը Հայաստանին օգնելու համալիր միջոցառումներ է առաջարկել, այդ թվում՝ առաքելություն ուղարկել Ադրբեջանի հետ սահման՝ իրավիճակը գնահատելու համար։
«Երբևէ չի եղել նման մի դեպք, որ Կրեմլի խոսքերն ու քայլերն իրար համապատասխան լինեն, հետևաբար նմանատիպ կեղծ հայտարարությունները զարմանալի և իրատեսական էլ չեն. էժան դեմագոգիա է: Իրականում խնդիրն այն է, որ Նիկոլ Փաշինյանը չի ստորագրել վերջին վեհաժողովի ժամանակ պատրաստված հռչակագիրը, որի արդյունքում ՀԱՊԿ ներկայացուցիչներն իրենց քայլերով փորձում են ցույց տալ, որ դրա դրդապատճառներն իրականությանը չեն համապատասխանում: Համենայն դեպս ես վստահ եմ՝ Փաշինյանի մեղադրանքները տեղին են, նույնիսկ՝ մեղմ: Սա Կրեմլի հերթական ապատեղեկատվությունն է. մանիպուլյացիա»,- «Հայկական ժամանակ»-ի հետ զրույցում ասում է Միսկարյանը:
Ըստ նրա՝ Հայաստանն անհապաղ պետք է դուրս գա ՀԱՊԿ-ից, որի մասին վերջին երեք ամիսների ընթացքում բազմիցս խոսվել է: Նրա համոզմամբ՝ Կառավարությունն այս մասով լուրջ քայլեր պետք է ձեռնարկի, քանի որ այդ կառույցը մեր երկրին բացի վնասից, ուրիշ ոչինչ տալ չի կարող:
«Իրավիճակն այնքան է վատթարացել, որ սրանից վատ չի էլ կարող լինել. վերջին 30 տարվա կտրվածքով ներկայումս Ռուսաստանի հետ Հայաստանի հարաբերությունները ամենավատ կետում են, ու պատճառն այն է, որ ՀՀ-ն փորձում է գնալ ինքնիշխանության ճանապարհով, որի համար էլ հստակ քայլեր է ձեռնարկում: Բնական է, որ հայկական կողմի վարած այս քաղաքականությունը ՌԴ-ին դուր չի գալիս. դա դեմ է նրա ներկա քաղաքական ծրագրերին»,- կարծում է նա:
ՀԱՊԿ-ից դուրս գալն ուղիղ ազդեցություն չի ունենա և չի փչացնի հայ-ռուսական հարաբերությունները, ընդգծում է զրուցակիցը, որովհետև դրանք վաղուց արդեն փչացել են. «Ռուսաստանը ներկայումս անում է իր ուժերի մաքսիմալը, դրանից զատ դժվար թե այլ բան կարողանա անել: Իսկ Հայաստանը պետք է որքան հնարավոր է բարելավի իր հարաբերությունները դաշնակից մյուս պետությունների հետ՝ քննարկելով անվտանգային կարևորագույն հարցրեր»:
Վերջինիս դիտարկմամբ՝ եթե Հայաստանը շարունակի մնալ ՀԱՊԿ անդամ երկիր, և Ռուսաստանը ՀՀ անվտանգությունն ապահովելու անվան տակ հավելյալ զորք մտցնի ՀՀ տարածք, ապա կարող ենք ասել, որ Հայաստանը կարճ ժամանակ անց հրաժեշտ կտա իր ինքնիշխանությանը. «Դեռ հնարավորություն ունենք՝ պաշտպանվելու և որոշակի քայլեր ձեռնարկելու, սակայն սխալ ռազմավարության հետևանքով այդ հնարավորությունները կչեզոքանան»:
Հարցին՝ ստեղծված իրավիճակում Հայաստանն ի՞նչ քաղաքականություն պետք է որդեգրի Ռուսաստանի հետ հարաբերություններում՝ վերջնականապես խզի՞, թե՞ գնա հարաբերությունների կարգավորման ուղով, Միսկարյանն ասում է. «Այս բազմաշերտ հարցում բարդ է որևէ միանշանակ բան ասելը: Հայ-ռուս տնտեսական սերտ կապերը թույլ չեն տալիս հեշտությամբ լուծումներ գտել, սակայն մի բան հստակ է՝ եթե հնարավորություն կա այս փուլում տնտեսական կապերը պահելու, պետք է պահել, ինչը միանշանակ չէ»:
Ըստ նրա՝ այն ապրանքաշրջանառությունը, որը մենք ունենք Ռուսաստանի հետ՝ որպես արտահանող երկիր, այդքան էլ մեծ չէ, այնպես է, որ դրանք այլ շուկաներում ևս կարող ենք գտնել: «Վստահ եմ, որ աշխարհի ժողովրդավարական ճամբարը մեզ մենակ չի թողնի և իր աջակցությունը կառաջարկի, եթե մենք իրական քայլեր ձեռնարկենք»,- ընդգծում է Միսկարյանը:
Նատալի Մկրտչյ