Աշխարհը կոչ է անում Թուրքիային հարգել միջազգային իրավունքը
Գերմանիայի կառավարությունն իր մտահոգությունն է հայտնել Իրաքյան Քուրդիստանի և Սիրիայի տարածքում թուրքական օդուժի սկսած ռազմական գործողությունների կապակցությամբ։
Գերմանիայի արտգործնախարարության խոսնակ Քրիստոֆեր Բարգերը կոչ է արել թուրքական իշխանություններին գործել առավելագույնս զգույշ և չանտեսել միջազգային իրավունքը, ինչպես նաև շեշտել քաղաքացիական անձանց պաշտպանության անհրաժեշտությունը՝ ծայրաստիճան մտահոգիչ համարելով ռազմաօդային ուժերի գործողության հետևանքով եղած զոհերի քանակը։
Ermenihaber-ի փոխանցմամբ՝ Քրիստոֆեր Բարգերը նաև նշել է, որ իրենք լրջորեն են վերաբերվում «Քուրդիստանի բանվորական կուսակցության» (PKK-ՔԲԿ) կամ նրան մոտ կանգնած ուժերի կատարած գործողություններին, բայց ըստ ՄԱԿ-ի կանոնադրության 51-րդ հոդվածի՝ ինքնապաշտպանությունը չի ներառում վրեժխնդրության իրավունք։
Նմանատիպ հայտարարությամբ է հանդես եկել նաև Եվրախորհրդարանի նախագահ Ռոբերտա Մեցոլան, ով կոչ է արել Թուրքիային հարգել միջազգային իրավունքը։
Ավելի վաղ ԱՄՆ-ի և Ռուսաստանի կողմից ևս Թուրքիային ուղղված զսպվածության կոչեր էին արվել Սիրիայի և Իրաքյան Քրդստանի տարածքում ռազմական գործողությունների վերսկսման առիթով։
Ավելի վաղ հայտնել էինք, որ Թուրքիայի նախագահ Ռեջեփ Թայիփ Էրդողանը Բալիում G20 գագաթնաժողովից վերադառնալուց հետո հրամայել է օդային գործողություն իրականացնել Իրաքում և Սիրիայում։
Նոյեմբերի 20-ին Թուրքիայի բանակի օդուժը հարվածել էր Իրաքում ու Սիրաիայում տեղակայված քրդական ուժերի դիրքերին։ Պաշտոնական Անկարան նրանց համարում է ահաբեկչական ուժեր: Ըստ Թուրքիայի պաշտպանության նախարարության տարածած հաղորդագրության՝ ավիահարվածների հետևանքով ոչնչացվել է 100 թիրախ, իսկ ավիագործողությունը կրում է «Մագիլ-Թուր» անվանումը:
armtimes.com
Նմանատիպ Լուրեր
