Մունդիալ-2022. Մեքսիկա-Լեհաստան հանդիպումն ավարտվեց գոլազուրկ ոչ-ոքիով
«Արմենպրես»-ի հաղորդմամբ` Կատարի մայրաքաղաք Դոհայի «975» մարզադաշտում կայացած հանդիպման մեկնարկային րոպեներին երկու թիմերը ուսումնասիրում էին մեկ մեկու` փորձելով գտնել մրցակցի խոցելի տեղերը: Վիճակագրությամբ առավելությունը Մեքսիկայի օգտին էր: Խաղակեսի միջնամասում Լեհաստանի ընտրանու գրոհներն առավել սուր էին դարձել, իսկ մեքսիկացիները շեշտը դնում էին հակագրոհների վրա:
Երկրորդ կեսում խաղային իրավիճակն նույնն էր` երկու թիմերը փոխանակվում էին գրոհներով, բայց դարպասի գրավում չէր արձանագրվում: Նույնիսկ Լեհաստանի հավաքականի առաջատար Ռոբերտ Լևանդովսկին չկարողացավ անվրեպ իրացնել նշանակված 11 մետրանոց հարվածը: Մեքսիկայի հավաքականի դարպասապահ Օչոան հաջող էր գործում նաև այլ իրավիճակներում:
Մեքսիկա-Լեհաստան`0:0:
Երկրորդ տուրի շրջանակներում Լեհաստանի հավաքականը կխաղա Սաուդյան Արաբիայի, իսկ Մեքսիկան` Արգենտինայի դեմ: Երկու խաղերը կկայանան նոյեմբերի 26-ին:
Լուսանկարը` Twitter