Ուզում եմ՝ մարդիկ իմանան, որ հոլը հայկական ազգային խաղ է. Նարեն երկրպագուներին ներկայացրեց «Մանկական-Եվրատեսիլ 2022»-ի խորհրդանիշը
«Արմենպրես»-ի հաղորդմամբ՝ լրագրողների հետ զրույցում երգչուհին ասաց՝ հույս ունի, որ շատերը կհետաքրքրվեն հոլով և կիմանան, որ այն հայկական ազգային խաղ է և հին պատմություն ունի: «Ինքս խաղալ գիտեմ: Մինչև մրցույթը իմացել եմ այս խաղի մասին, բայց չեմ խաղացել: Ուրախ եմ, որ «Մանկական Եվրատեսիլ»-ի շրջանակում խաղալ սովորեցի, ինչն ինձ հեշտ տրվեց»,-նշեց Նարեն:
Մինչ երկրպագուների հետ լուսանկարվելը, հոլ խաղալը, Նարեն խոստովանեց, որ շատ լավ տրամադրություն ունի և հավանում է իր եվրատեսիլյան Dance! երգը, որի երաժշտությունը գրել են Գրիգոր Կյոկչյանը և Նիկ Էգիբյանը, խոսքերը՝ Գրիգոր Կյոկչյանը:
«Ինձ շատ դուր է գալիս իմ երգը: Կարծում եմ՝ սա այն երգն է, որը պետք է իմը դառնար: Եվրատեսիլյան ընկերներս ևս հավանում են այն: Շատ ուրախ եմ, որ ինձ հետ են լինելու մրցույթի ամբողջ ընթացքում, քանի որ ոգևորում են ինձ, ես էլ՝ նրանց: Միասին հրաշք ենք գտնելու»,-ասաց նա:
Նարեն դեռ հնարավորություն չի ունեցել լինելու եվրատեսիլյան բեմում: Բեմը միայն լուսանկարներով է տեսել և շատ հավանում է: Նա վստահ է՝ Հայաստանը շատ լավ կներկայացնի մրցույթում:
Բազմամարդ միջոցառմանը «Իմ ֆռռիկը» ապրանքանիշի հիմնադիր Գագիկ Մխիթարյանը հիշեցրեց, որ հոլն ի սկզբանե ծառայել է որպես զենք, սակայն ժամանակի ընթացքում որպես խաղ մտել է մարդկանց կենցաղ ու վերածվել հետաքրքիր ժամանցի: «Հայկական լեռնաշխարհի տարբեր հատվածներում տարբեր կերպ են հոլ խաղացել: Այն տարբեր անուններ է ունեցել: Վերջին ժամանակներում սկսել են քիչ խաղալ, սակայն մենք փորձեցինք նոր կյանք տալ հոլին, տարածել այն, ինչի արդյունքում այն դարձավ «Մանկական Եվրատեսիլ 2022»-ի խորհրդանիշը»,-ասաց Մխիթարյանն ու ներկաներին բացատրեց հոլ խաղալու նրբությունները:
Մրցույթի այս տարվա խորհրդանիշ հոլի տեսակը հատուկ է հայկական մշակույթին և զարդարված է ազգային նախշերով։ Այդ նախշերը Հայաստանում կարելի է տեսնել պատմական-ճարտարապետական հուշարձանների, գորգերի և հագուստի վրա։ Ավանդական փայտե խաղալիքներին տրվել է նեոնային տեսք, որն արտացոլում է ժամանակակից Հայաստանը։
Ընտրվել է այնպիսի խորհրդանիշ, որը կարտացոլի և՛ հրաշքի գաղափարը, և՛ «Մանկական Եվրատեսիլի» 20-ամյակը՝ միավորելով մասնակից բոլոր մանուկներին:
«Մանկական Եվրատեսիլ 2021»-ում Մալենայի հաղթանակի շնորհիվ մրցույթը 2022-ին կանցկացվի Հայաստանում: Այն տեղի կունենա դեկտեմբերի 11-ին Կարեն Դեմիրճյանի անվան մարզահամերգային համալիրում:
Հայաստանը կհյուրընկալի 16 երկրի մասնակցի: Այդ երկրներն են Ալբանիան, Իռլանդիան, Իտալիան, Իսպանիան, Լեհաստանը, Հյուսիսային Մակեդոնիան, Ղազախստանը, Մալթան, Նիդեռլանդները, Պորտուգալիան, Սերբիան, Ուկրաինան, Միացյալ Թագավորությունը, Վրաստանը, Ֆրանսիան։ Միացյալ Թագավորությունը, որը Ուկրաինայի փոխարեն հյուրընկալելու է «Եվրատեսիլ 2023» երգի մրցույթը, 2005 թվականից ի վեր առաջին անգամ կմասնակցի մրցույթին։
Նմանատիպ Լուրեր
«Արմատ» հայկական կարճամետրաժ մուլտֆիլմը՝ «Օսկարի» հավակնորդ․ The Hollywood Reporter
The Hollywood Reporter-ը նշել է 15 անիմացիոն կարճամետրաժ ֆիլմերից մեկը՝ ARMAT-ը կարող է արժանանալ Օսկարի։
Պեկինում անցկացվում է Խաչատրյանի անվան միջազգային մրցույթ
Չինաստանի մայրաքաղաք Պեկինում դեկտեմբերի 17-ին մեկնարկել է Խաչատրյանի անվան միջազգային հոբելյանական մրցույթը՝ «ջութակ» մասնագիտական կարգում։ Այն նվիրված է Արամ Խաչատրյանի 120-ամյա հոբելյանին։
Հայաստանում NETFLIX-ի համար ֆիլմեր ու սերիալներ կնկարահանվեն
Հայաստանում NETFLIX-ի համար ֆիլմեր ու սերիալներ կնկարահանվեն։
Գյումրու դարբնության ավանդույթը ՅՈՒՆԵՍԿՕ-ի ոչ նյութական մշակութային ժառանգության ներկայացուցչական ցանկում է
Դարբին Գարիկն ասում է, թե իրեն հարցնեն Գյումրու դարբնության ավանդույթում ինչն է ամենակարևորը, երևի կպատասխանի, որ․ «Ամեն գործդ կմտածես ընպես սարքես, որ բոլորի դուրն էլ գա, բայց առաջինը քո դուրը գա։ Էս գործը հա՛մ արհեստ է, հա՛մ արվեստ է, մենակ ուժով չի, պետք ա ուղեղ էլ ունենաս ու սիրտ»։
ՅՈՒՆԵՍԿՕ-ն կաջակցի Տաթևի և Մեծ անապատ վանական համալիրների եռաչափ լազերային սկանավորմանն ու թվայնացմանը
ՅՈՒՆԵՍԿՕ-ի կողմից հաստատված դրամաշնորհը կազմում է շուրջ 55․000 ԱՄՆ դոլար, որով նախատեսվում է իրականացնել Տաթևի և Տաթևի Մեծ անապատ վանական համալիրների կազմի մեջ մտնող բոլոր կառույցների, ենթահուշարձանների եռաչափ լազերային սկանավորում և մանրամասն թվայնացում, կառավարման և ռիսկերի նվազեցման համապատասխան ծրագրերի կազմում, միջազգային փորձագետների խորհրդատվություն, պետական հաշվառման փաստաթղթերի լրամշակում, որոնց հիման վրա կպատրաստվի և ՅՈՒՆԵՍԿՕ կներկայացվի հուշարձանախումբը «Զինված հակամարտությունների պայմաններում մշակութային արժեքների պաշտպանության կոնվենցիա»-ի հովանու ներքո առնելու հայտը։
45 տարի անց Գյումրիում ցուցադրության են ներկայացվել Մինաս Ավետիսյանի գործերը
45 տարի անց Գյումրիում ցուցադրության են ներկայացվել ՀՀ վաստակավոր նկարիչ Մինաս Ավետիսյանի գործերը։