ՀՀ-ն կարող է հարատևել միայն նրա քաղաքացիների՝ պետություն ունենալու կամքի առկայությամբ. ՀՀ Վարչապետ
«Իմ կարծիքով՝ մենք շատ կարևոր քայլ ենք անում և պետության կարևորագույն ինստիտուտներից մեկի վերաբերյալ որոշում ենք կայացնում: Նման քայլերի տրամաբանությունը թերևս բխում է մեր գաղափարական այն արձանագրումից, որ պետությունը և Հայաստանի Հանրապետությունը կարող է հարատևել միայն նրա քաղաքացիների՝ պետություն ունենալու կամքի առկայության վրա: Այսինքն՝ պետությունը հիմնվում է պետություն ունենալու քաղաքացիական կամքի վրա»,- այսօր՝ նոյեմբերի 17-ին, Կառավարության հերթական նիստում քաղաքացիների համընդհանուր հայտարարագրման վերաբերյալ հարցի քննարկմանը ասաց վարչապետ Նիկոլ Փաշինյանը և հավելեց, որ սա մի ինստիտուտ է, որը հենց այդ կամքի արձանագրումն է:
Վարչապետը այս առումով հիշեցրեց անշարժ գույքի հարկի հետ կապված օրենքը. «Մենք քաղաքական որոշում կայացրինք, որ եթե մարդու գույքահարկը տարեկան 100 դրամ է, այդ 100 դրամը քաղաքացին պետք է վճարի. էդ 100 դրամը իր կյանքը հաստատ չի վատացնելու և պետական բյուջեին էլ բան չի տալու, բայց դա արտահայտություն է լինելու պետություն ունենալու քաղաքացու կամքի»:
Նիկոլ Փաշինյանի խոսքով՝ սա ավելի համապարփակ որոշում է. «Եվ ես ուրախ եմ, որ մենք այս որոշումը կայացնում ենք, սակայն այն պետք է լավ նախագծել: Դրանում ոչ մի պրոբլեմ չկա, փուլային եղանակով է համակարգը ներդրվում: Պետք է կոնսոլիդացնենք քաղաքական և քաղաքացիական կամքը, որը պետք է արտահայտվի այդ թվում նաև բյուջեի պետական եկամուտների աճով, որը պետք է արտահայտվի նաև թափանցիկությամբ, հաշվետվողականությամբ: Եվ սա պետություն ունենալու քաղաքացիական կամքի ինստիտուցիոնալ արտահայտություններից մեկն է»:
civic.am