Հայաստանի Առաջին Հանրապետության մեր պետական այրերը․ Միքայել Վարանդյան
Ավարտվել է Շուշիի ռեալական ուսումնարանը, հետագայում՝ Ժնևի և Ցյուրիխի համալսարանները: Միքայել Վարանդյանը եղել է հայկական անկախ պետականության ստեղծման գաղափարախոս, այդ հարցի կայուն գաղափարակիր և նվիրյալ, համարել է, որ այդ պետության ստեղծումն ու զարգացումը հենց պետք է դիտվեն որպես հայության ձգտումների գերագույն իղձն ու նպատակը, որ միայն ինքնիշխան պետականության գոյության պարագայում հնարավոր կլինի ապահովել ազգի գոյությունը, նրա անվտանգությունն ու զարգացումը:
1919թ. ընտրվել է Հայաստանի Հանրապետության Խորհրդարանի պատգամավոր: Հաշվի առնելով եվրոպական լեզուներին, այդ թվում նաև իտալերենին նրա տիրապետելը և, առհասարակ, եվրոպական սոցիալ – դեմոկրատիայի միջավայրին և հոսանքներին նրա քաջածանոթ լինելը և եվրոպական հասարակությանը տարիների ընթացքում հայ ազգի խնդիրներին հաղորդակից դարձնելու նրա փորձը, 1920-ին Հայաստանի Հանրապետության կառավարությունը Մ.Վարանդյանին նշանակում է Հայաստանի դիվանագիտական ներկայացուցիչ Իտալիայում: Դիվանագիտական ծառայությունից զատ Վարանդյանը Իտալիայում իր ծանրակշիռ մասնակցությունն է բերել նաև «ՆԵՄԵՍԻՍ» գործողության իրականացմանը այդ երկրի տարածքում:
Միքայել Վարանդյանը որպես գաղափարախոս, իր ամբողջ գիտակցական կյանքի ընթացքում պայքար է մղել ընդդեմ բոլշևիկյան գաղափարախոսության, մշտապես շեշտել է ռուսական վտանգի առկայությունը հայության համար, խիստ անհաշտ է եղել հայ բոլշևիկների նկատմամբ, մշտապես շեշտել նրանց օտարահպատակ և խիստ հակազգային բնույթն ու էությունը:
lragir.am