Փոխվարչապետ Մհեր Գրիգորյանն ասաց, որ երկու դրամաշնորհային համաձայնագրեր են կնքվելու Հայաստանի և Եվրոպական հանձնաժողովի միջև։ Ծրագրերը ֆինանսավորվելու են Եվրոպական միության բյուջեից։

«Առաջինը վերաբերում է ոստիկանության և միգրացիոն բարեփոխումներին, մարդու իրավունքների պաշտպանությանը։ Ծրագրով նախատեսված է 10 մլն եվրո դրամաշնորհային աջակցություն տրամադրել ոստիկանության բարեփոխումների իրականացման, միգրացիայի կառավարման և մարդու իրավունքների պաշտպանության ուղղություններով։ Մասնավորապես, աջակցությունը կտրամադրվի Ներքին գործերի նախարարության ձևավորմանը, ոստիկանության բարեփոխումների իրականացմանը, այդ թվում՝ պարեկային ծառայության ընդլայմանը, միգրացիոն ծառայությունների մատուցման բարելավմանը»,- ասաց Մհեր Գրիգորյանը։

Մյուս համաձայնագրով նախատեսված է 23 մլն եվրո դրմաշնորհային աջակցություն տրամադրել Հայաստանին՝ ուղղված ներառական և դիմակայուն սոցիալ-տնտեսական վերականգնմանը և զարգացմանը։ Մասնավորապես, ծրագրի առաջին բաղադրիչով աջակցություն կտրամադրվի Սյունիքի մարզում ՓՄՁ-ների ստեղծմանը, զարգացմանը և գործող բիզնեսների վերականգնմանը։ Այս բաղադրիչով շուրջ 1500 միկրո և միջին ձեռնարկություններ և անհատ ձեռնարկատերեր կստանան կարողությունների զարգացման աջակցություն, առնվազն 200 միկրո, փոքր և միջին ձեռնարկությունների կտրամադրվեն դրամաշնորհներ՝ բիզնեսների արտադրողականության բարձրացման և ԵՄ շուկա արտահանման խթանման նպատակով։

Կֆինանսավորվեն նաև Սյունիքի մարզում գյուղատնտեսական ենթակառուցվածքների, այդ թվում՝ արոտավայրերի հասանելիությանը և ոռոգման համակարգերի վերականգնման ուղղված նախաձեռնությունները։ Նաև թիրախային աջակցություն կցուցաբերվի Արցախից տեղահանված անձանց ինտեգրման և սոցիալ-հոգեբանական աջակցության նախաձեռնություններին։ Վարչապետ Նիկոլ Փաշինյանն ասաց, որ նախորդ տարի Եվրամիության հետ պայմանավորվածություն է ձեռք բերվել, ըստ որի՝ ներդրումային և տնտեսական ծրագրով մինչև 2026 թվականը Եվրամիությունը Հայաստանին 2․4 մլրդ եվրոյի աջակցություն կցուցաբերի։ Մհեր Գրիգորյանն ասաց, որ այս ծրագրերն առնչվում են այդ ծրագրին։

lragir.am