Գարեգին Նժդեհ սպարապետը եւ ազգային հերոսը
1955 թ․-ի դեկտեմբեր 21-ին, Խորհրդային Միութեան ծայր աստիճան «վտանգաւոր» նկատուած «բանտարկեալ»ներու Վլատիմիր բանտին մէջ, իր վերջին շունչը փչեց հայ ազգային-ազատագրական շարժման անկրկնելի հերոսներէն Գարեգին Նժդեհ։
Հայ ժողովուրդը միայն յաւուր պատշաճի յարգանքի տուրք ընծայելու մղումով չէ, որ կ’ոգեկոչէ Նժդեհի մահուան տարելիցը։ Ոչ ալ տարուան միայն այս օրը կը ստեղծէ պատեհութիւնը, որպէսզի ամենայն երկիւղածութեամբ իր մտքին ու հոգիին կիզակէտին բերէ Նժդեհի անձն ու գործը, Դաշնակցական Սպարապետին եւ Ցեղակրօն Ազգային Հերոսին առաջնորդող մտածումները։
Ամէն բանէ առաջ, իր ժամանակէն վեր բարձրացած եւ բոլոր ժամանակներուն համար հայոց սերունդներուն ներշնչման աղբիւր դարձած ազգային հերոսն է Գարեգին Նժդեհ, որուն մարտական եւ կազմակերպական հանճարին կը պարտինք ազատագրումն ու հայացումը հայոց Սիւնեաց Աշխարհին՝ Զանգեզուրին։
Միաժամանակ՝ Դաշնակցութիւնը իւրովի մարմնաւորած ու Յեղափոխական Հայու ԴԱՇՆԱԿՑԱԿԱՆ ուրոյն ԴՊՐՈՑ մը ստեղծած նոր ժամանակներու Հայոց անդրանիկ Սպարապետն է Նժդեհ։
Հետեւաբար, որքան ալ ժամանակը անցնի եւ որքան ալ հնաբոյր թէ նորելուկ գաղափարախօսներ փորձեն Դաշնակցութենէն դուրս եւ Դաշնակցութեան հակադրաբար հիւսել գովքը Նժդեհ Գարեգինի Գործին եւ Պատգամին, ըստ ամենայնի բան չի փոխուիր պատմական ճշմարտութենէն։ Ինչպէս Անդրանիկ, այնպէս եւ Նժդեհ ԵՐԵՒՈՅԹՆԵՐը անբացատրելի կը մնան ԴԱՇՆԱԿՑՈՒԹԵՆԷՆ դուրս, աւելին՝ անհեթեթ կը դառնան Դաշնակցութեան հակադրաբար արժեւորուելու պարագային։
Այո՛, Դաշնակցութեան մէջ իր գործած շրջանին եւ դաշնակցականօրէն իր կատարած գործով է, որ Գարեգին Նժդեհ նուաճեց իր հերոսական բարձունքը հայ ժողովուրդի մտքին ու սրտին մէջ։
Այսօր կ՚ոգեկոչենք մահուան վաթսունամեակը հայ ժողովուրդի եւ Հայաստանի ազատագրութեան համար անվեհեր պայքարի բոլոր ճակատներուն վրայ անպարտելի գործած դաշնակցական Գարեգին Նժդեհին, որ ռազմի ճակատին վրայ չինկաւ, այլ դաւադրաբար զոհ գնաց պոլշեւիզմին՝ խորհրդայիններու հակադաշնակցական մոլուցքին։
Խորհրդայինները 1920-ականներէն սկսեալ բնաւ չներեցին Զանգեզուրը Հայաստանի անառիկ դարպասին վերածած եւ «Դաշնակցութեան փառքն ու ողբերգութիւն»ը ամենայն խրոխտութեամբ ու հնչեղութեամբ հայոց պատմութեան աւանդ կտակած Հայոց Սպարապետին։
Արդարեւ, հայ ժողովուրդի պատմութեան նորագոյն շրջանի ոսկեմատեանին մէջ եզակի դէմք մը եղաւ Նախիջեւանի Կզնութ գիւղի ծնունդ՝ Տէր-Յարութիւնեան քահանայի կրտսեր որդի Գարեգինը, որ հայոց աշխարհով մէկ հռչակուեցաւ Նժդեհ անունով։
Ծնած էր 1 Յունուար 1886-ին եւ ապրեցաւ մինչեւ 1955 թուականի Դեկտեմբեր 21-ը, երբ խորհրդայիններուն ձեռքը պատանդ ինկած եւ սիպիրեան կալանավայրերու մէջ ֆիզիքապէս հիւծած՝ իր պաշտած հայ ժողովուրդէն ու Հայաստանէն հեռու, առյաւէտ փակեց այնքան հայու անմեղ արեան հեղում եւ վիշտ տեսած աչքերը, այլեւ՝ կռուի ու պայքարի հուրով առլցուն իր ցասկոտ հայեացքը։
Գարեգին Նժդեհ անունը յաւերժացաւ յատկապէս 1920-21 թուականին, երբ Հայաստանի Հանրապետութեան Բիւրօ-Կառավարութեան օրով եւ ատենի Հ.Հ. պաշտպանութեան նախարար Ռուբէնի հրահանգով՝ զօրավար Նժդեհի յանձնարարուեցաւ սեփական կեանքի գնով պաշտպանութիւնը Զանգեզուրի։ Առաքելութիւն մը՝ որ յաղթական փառքով պսակուեցաւ եւ անպարտելի ռազմիկի դափնիով յաւերժացուց բաց ճակատը Նժդեհի։
Ուսումնասէր եւ հոգեմտաւոր հարուստ պաշարի տէր էր Նժդեհ։ Իր ծննդավայրի ռուսական դպրոցն ու Թիֆլիսի ռուսական գիմնազիան աւարտելէ ետք, ան բարձրագոյն ուսման հետեւեցաւ Փեթերսպուրկի համալսարանի իրաւաբանութեան բաժնին մէջ։
Չաւարտեց ուսումը, որովհետեւ 17 տարեկանէն արդէն հայ ազգային-ազատագրական շարժման ահագնացող ալիքը գրաւած էր միտքն ու սիրտը ըմբոստ Գարեգինի։ Միաժամանակ ցարական եւ համիտեան բռնատիրութեանց դէմ պայքարի դաշտ նետուելու պատրաստ՝ Նըժդեհ իր յեղափոխական մկրտութեան հարազատ աւազանը գտաւ Դաշնակցութեան մէջ եւ միացաւ անոր շարքերուն։ Յատկապէս Ռոստոմի օրինակը առաջնորդող տեղ եւ նշանակութիւն ունեցաւ Նժդեհի կեանքին մէջ։ Ռոստոմի յորդորով ալ Նժդեհ միացաւ Պուլկարիոյ մէջ Դաշնակցութեան հաստատած զինուորական վարժարանին, փայլուն աւարտեց զայն եւ վերադարձաւ Թիֆլիս։
Իր կարգին ձերբակալուեցաւ եւ բանտարկուեցաւ Դաշնակցութեան դէմ 1909-ին ցարական իշխանութեանց ծաւալած հալածանքին հետեւանքով։ Եւ երբ 1912-ին անպարտ արձակուեցաւ եւ 1913-ին բռնկեցաւ Պալքանեան Պատերազմը, Նժդեհ փութաց ստանձնելու հրամանատարութիւնը Դաշնակցութեան կազմած հայկական զօրագունդին, որ պուլկար յեղափոխականներու կողքին պատերազմի դաշտ նետուեցաւ օսմանեան զօրքին դէմ։ Պալքանեան Պատերազմը արեան մկրտութիւնը եղաւ ռազմագէտ Նժդեհի, որ իբրեւ Դաշնակցական Զօրավարի հռչակուեցաւ՝ իր քաջութեամբ ու ռազմավարական-կազմակերպական տաղանդով։
Այդ շրջանին նաեւ երեւան եկաւ Նժդեհի անհատականութեան առանձնայատուկ երեսը, որ անոր արտակարգ ինքնավստահութիւնն էր, որուն հետեւանքով բախումներ ունեցաւ նոյնպիսի՛ անհատականութեան տէր Անդրանիկի հետ, որ գլխաւոր հրամանատարն էր հայկական զօրագունդին։
Պալքանեան Պատերազմէն սկսեալ, անցնելով Հայ Կամաւորական Երկրորդ Գունդի հրամանատարութենէն ու 1918-ի Մայիսեան Հերոսամարտներու ընթացքին իր առանձին ջոկատով գործած սխրանքներէն, եւ յանգելով 1919-1921 Լեռնահայաստանի գոյապաքարին փառապանծ ղեկավարման, Գարեգին Նժդեհ արժանաւորապէս մարմնաւորեց Դաշնակցական Սպարապետի հերոսական կերպարը։
Հայաստանի վերջնական խորհրդայնացումէն ետք Նժդեհ հաստատուեցաւ ու գործեց Պալքաններու մէջ։ Նժդեհ ոչ միայն ղեկավար դերակատարութիւն ունեցաւ Պալքաններու տարածքին Դաշնակցութեան կազմակերպական հզօրացման մէջ, այլեւ՝ Հիւսիսային Ամերիկայի մէջ, ուր պատմական նշանակութեամբ հայապահպանման գործ կազմակերպեց եւ ղեկավարեց։
Օտար ափերու վրայ ուծացման, ինքնալքութեան եւ վերջնական ձուլման դատապարտուած տարագիր հայութեան ցիրուցան բեկորները ի մի բերելու, զանոնք հայկական հպարտութեամբ զինելու եւ Հայաստանի ու հայութեան պաշտամունքով պահպանելու նպատակով՝ Նժդեհ 1933-ին իբրեւ գործիչ ուղարկուեցաւ Մ. Նահանգներ եւ Գանատա, ուր եւ հիմը դրաւ Հ.Յ.Դ. Ցեղակրօն Ուխտերուն, որոնք հետագային դարձան Հայ Երիտասարդաց Դաշնակցութեան կորիզները։
Երկրորդ Աշխարհամարտի նախօրէին Պալքաններ վերադառնալէ ետք, Նժդեհի ուժեղ անհատականութեամբ դաշնակցական ղեկավար գործիչը կազմակերպական բախումներ ունեցաւ օրուան Հ.Յ.Դ. Բիւրոյին հետ։ Հետեւանքը եղաւ Պալքաններու Հ.Յ.Դ. կազմակերպութեան պառակտումը՝ նժդեհական եւ հականժդեհական թեւերու միջեւ։ Նժդեհի գլխաւորած Կեդրոնական Կոմիտէն ըմբոստացաւ Հ.Յ.Դ. Բիւրոյին դէմ ու Դաշնակցութենէն հեռացուեցաւ։ Իսկ «ցեղակրօնութիւնը» դարձաւ Դաշնակցութիւնը խոցած գաղափարական այդ ճեղքին բաժանարար գիծը։
Երկրորդ Աշխարհամարտի ամբողջ տեւողութեան, Դաշնակցութենէն դուրս գտնուելով եւ Պալքաններու մէջ իր ուրոյն ցեղակրօն կազմակերպութիւնը կեանքի կոչելով հանդերձ՝ Նժդեհ իրողապէս ինք ղեկավարեց Պալքաններու դաշնակցական ընտանիքը։ Իբրեւ այդպիսին գործակցեցաւ Նացիներուն հետ եւ պաշտպանեց Պալքաններու հայութիւնը թէ՛ խորհրդային եւ թէ թրքական ոտնձգութեանց ու սպառնական վտանգներու դէմ։ Իսկ երբ Սեպտեմբեր 1944-ին Կարմիր Բանակը գրաւեց Պուլկարիան եւ պատերազմը աւարտեցաւ Նացիներու պարտութեամբ, Նժդեհ փախուստ չտուաւ եւ մինչեւ Դեկտեմբեր 1944-ին խորհրդայիններու կողմէ իր ձերբակալութիւնը՝ շարունակեց պաշտպան կանգնիլ Պալքաններու հայութեան։
1947-ին խորհրդայինները Մոսկուա տեղափոխեցին Նժդեհն ու անոր բախտակից դաշնակցական գործիչները։ 1948-1952 Նժդեհ պահուեցաւ ծայր աստիճան «վտանգաւոր» նկատուած «բանտարկեալ»ներու Վլատիմիր բանտը։ 1952-ին մէկուկէս տարիով ղրկուեցաւ Երեւանի բանտը, բայց 1953-ին վերստին տարուեցաւ Վլատիմիրի բանտը, ուր եւ մահացաւ 21 Դեկտեմբեր 1955-ին։
Նժդեհի հետ դաշնակցականներու ամբողջ փաղանգ մը ինկաւ խորհրդայիններու ձեռքը։
Սիպիր աքսորուած դաշնակցական գործիչներէն շատեր ազատ արձակուեցան խրուշչովեան ձիւնհալի օրերուն։ Անոնց Սփիւռք գալով վերագնահատումի արժանացաւ Պալքաններու դաշնակցական կազմակերպութեան գործունէութիւնը։
Եւ երբ Նժդեհի բանտակից ընկերոջ՝ դաշնակցական ծանօթ գործիչ Յովհաննէս Տեվէճեան եւ տարիներու գործակից Կարօ Գէորգեան օրին հրապարակեցին Նժդեհի մահուան գոյժը, Դաշնակցութիւնը վերականգնեց իր մեծ գործիչին արժէքն ու տեղը Հ.Յ.Դ. պատմութեան եւ սերունդներու յիշողութեան մէջ։
Հայու Կամքին եւ Գաղափարի Ուժին դաշնակցակա՛ն մարմնաւորումը հանդիսացող Գարեգին Նժդեհի մահուան վաթսունամեակին ոգեկոչումը հաղորդութեան պահ է՝ վերանորոգուելու համար անոր մտքերու անլռելի զանգակատունով.
– Երբե՛ք, առանց Սիւնիքի՝ առանց Հայաստանի աշխարհագրական այդ ուժեղ ողնաշարին, մեր ամբողջական Հայրենիքը գոյութիւն ունենալ չի կարող։
– Ոմանք արեւը միայն խաւարման ժամանակ են նկատում:
– Չի կարելի օգնել այն ընկածին, եթէ նրան պակասում է ինքնօգնութեամբ ոտքի կանգնելու կամքը:
– Երկու բան պէտք է լցնի մարդու հոգին հիացմունքով ու յարգանքով՝ աստղալից երկինքը գլխի վերեւում եւ բարոյական օրէնքը սրտի մէջ:
– Իրաւունքը ուժի հասկացողութիւն է, այլ ոչ տրամաբանական:
– Մի ժողովուրդ, որի որդիները հաւասար չեն օրէնքի եւ մահուան առջեւ` յաղթական հայրենիք չի ունենայ:
– Կրօնների պէս հայրենիքներն էլ պահանջում են, որ իրենց սպասարկողի ձեռքերը լինեն տաք եւ մաքրամաքուր:
– Ապագան վտանգուած ժողովուրդների վերջին խաղաթուղթը – վերադաստիարակութիւնն է:
– Իւրաքանչիւր ազգի պարտականութիւնը մարդկութեան հանդէպ նախ եւ առաջ դրսեւորւում է սեփական ազգի կենսունակութեան պահպանման եւ սեփական մշակոյթի զարգացման ձեւով:
– Քննադատել՝ հոգեպէս տառապել է նշանակում:
– Իմ ազգային դաւանանքը թոյլ չի տալիս թշնամանք տածել դէպի ոեւէ հայ մարդ:
– Եօթնիցս ստոր է նա, ով գերադասում է կեանքը մահէն բոլոր պարագաների մէջ:
– Մահ չկայ, մեռնում է փոքրոգին, մեռածն է մեռնում:
– Քաջերի յարութիւնն է մահը:
– Ապստամբ ժողովրդին միայն Աստուած կարող է յաղթել:
– Մի ժողովուրդ` մի ընտանիք:
– Սիրում է նա, ով ուժեղ է, ով հոգու առատութիւն ունի, ում ոյժի բաժակը լցուած է յորդելու, թափուելու աստիճան:
– Այն օրից, ընթերցող, երբ հայը վախենալ սկսեց մահից, այն օրից օտարը թագաւորեց Հայաստանում:
– Ով հեռանում է կրօնից, անձնասպանօրէն կտրում է իր հոգեւոր զարկերակը:
– Մի օր հայութիւնը պիտի ների թրքութեան, բայց ոչ ծունկի եկած նրա առջեւ, պարտուելուց յետոյ, այլ նրան ծնկի բերած` ծեծելուց յետոյ:
– Միայն նա է ճշմարտօրէն մեծը, որը մեծ զաւակն է նախ իր ժողովրդի, եւ ապա՝ մարդկութեան:
– Ամէն մէկ «ես» յանցաւոր ապստամբ մը, ամէն մէկ «ես»ականութիւն` բարոյական մահափորձ մըն է այն Մեծ Ամբողջին դէմ, որ ԱԶԳ կը կոչենք:
– Սկզբից ի վեր հայութիւնն ու իր քրիստոնէութիւնը ձուլուած են ի մի բնութիւն: Այս երկուսի ճակատագիրը նոյնացած է:[
– Հայ եկեղեցին ազգային եկեղեցի է:
– Իմ հոգին զոյգ յենարաններ ունի` Աստուած եւ հայրենիք:
– Չկայ, կեանքն ազգին եւ հայրենիքին պատարագելու չափ մեծ երջանկութիւն չկայ աշխարհում:
– Ամէն հայ ընդունակ է մարտիրոսանալու, իսկ ամէն մարտիրոս կարող է հերոս լինել:
– Աւելի լաւ է հայ մարդը համր լինի, քան օտարախօս:
– Նա (ազգս) գերագոյն նպատակ է, ես` միջոց:
– Նա, ով ընդունում է Աստծոյ գոյութիւնը, ընդունում է նաեւ իր պարտականութիւնը հանդէպ գերագոյն իրականութեանց` ԱԶԳ, ՀԱՅՐԵՆԻՔ, ՊԵՏՈՒԹԻՒՆ:
Նազարէթ Պէրպէրեան