ՔՊ-ում չեն բացառում, որ նորից անդրադառնան ընդդիմադիրներին մանդատից զրկելու հարցին
Խորհրդարանական ընդդիմությունը դեռ չի հստակեցնում՝ խորհրդարան կվերադառնա՞ն, թե՞ ոչ։ Radar Armenia-ն իշխող «Քաղաքացիական պայմանագիր» խմբակցության քարտուղար Արթուր Հովհաննիսյանից հետաքրքրվեց՝ եթե ընդդիմությունը շարունակի չմասնակցել խորհրդարանի աշխատանքներին, իշխանությունը կսկսի՞ մանդատներից զրկելու գործընթաց, թե՞ ոչ։
Ըստ Հովհաննիսյանի՝ ԱԺ նախորդ նստաշրջանի ժամանակ իրենց հիմնավորումներում նշել են, թե ինչու ԱԺ փոխնախագահի և տնտեսական հարցերի մշտական հանձնաժողովի նախագահի պաշտոններից զրկեցին ընդդիմադիր գործիչներին, քանի որ նրանք չէին աշխատում և խանգարում էին ԱԺ բնականոն աշխատանքը։ «Մենք հայտարարել էինք, որ մանդատներից զրկելու հարցը մեզ համար փակ չէ, բայց այս պահին՝ այս նստաշրջանում, չենք անդրադառնա այդ հարցին։ Ես ուզում եմ, որ սա արձանագրենք՝ մենք չենք զրկում որևէ մեկին մանդատից։ Մենք կոնկրետ հիմքով դիմում ենք ՍԴ, և Սահմանադրական դատարանն է որոշում՝ այդ հիմքերին համապատասխան զրկվելու՞ են կոնկրետ պատգամավորներն իրենց մանդատներից, թե՞ ոչ»,- պարզաբանեց Հովհաննիսյանը։
Նա անիմաստ համարեց այս պահին մանդատներից զրկելու գործընթացի մասին խոսելը՝ շեշտելով, որ ԱԺ աշնանային նստաշրջանը նոր է մեկնարկում, և բացակաների հաշվարկը «զրոյից է սկսվելու հաշվվել». «Եթե մենք ունենանք նույն պատկերը, ինչ նախորդ նստաշրջանում, չեմ բացառում, որ այդ հարցը կրկին կքննարկվի խմբակցությունում, և, ըստ այդմ, կկայացվի համապատասխան որոշում»։
Հիշեցնենք՝ երեկ խորհրդարանական ընդդիմադիր «Հայաստան» և «Պատիվ ունեմ» խմբակցությունների ներկայացուցիչները Radar Armenia-ի հետ զրույցում ասացին, որ Ազգային ժողով վերադառնալու հետ կապված հայտարարությամբ հանդես կգան։
Հայկ Մագոյան
Նմանատիպ Լուրեր
