HAYAZD - Թվականիս սեպտեմբերի 1-ին, «ՀՄՀՖ»-ի և «ՍՄԱԲ» Կենտրոնում տեղի ունեցավ իրանահայ «Բիզինես Ֆորումի» կանոնագրության մշակման և վավերացման հանձնախմբի եզրափակիչ նիստը: Հանձնախումբը չորս հերթական նիստերից հետո մշակեց ու վեռջնական տեսքի բերեց առաջին «Իրանհայ Գործարարների Միության» կանոնագիրը, որը ստորագրվեց ժամանակավոր դիվանի բոլոր անդամների կողմից և պատրաստվեց հաջորդ փուլի՝ պետական գրանցման համար: Կանոնագրի գրանցվելուց հետո ավելի քան 500 իրանահայ գործարարների հնարավորություն կտրվի անդամակցել Միությանը և առավել ակտիվ գործունեություն ծավալել երկրի տնտեսության մեջ:

«Բիզինես Ֆորում»-ը նպատակ ունի համախմբել տվյալ կառույցի շուրջ իրանահայ գործարարների, ձեռնարկատերերի և տնտեսվարողների ավելի լայն շրջանակ, զարգացնել իրանահայության բիզինես միջավայրը, ապահովել իրանահայ արդյունաբերական ընկերությունների և ձեռնարկությունների ներկայությունը իրանական, միջազգային և Հայաստանի բիզինես շուկաներում, աջակցել իրանահայ տնտեսապես խոցելի խավին, ստեղծել նոր աշխատատեղեր: Կառույցը կարող է նաև մեծ խթան հանդիսանալ Իրան-Հայաստան հարաբերությունների առավել զարգացմանը:  

Լուրը Կազմեց՝ Սոնա Աղազարյանը

Լուսանկարիչ՝ Նարե Սեղբոսյան