Հայաստանի ԱԳՆ-ն հայտարարել է միջազգային մեխանիզմների մասին
Հայաստանի Հանրապետությունը, ևս մեկ անգամ վերահաստատելով իր հավատարմությունը տարածաշրջանում խաղաղություն և կայունություն հաստատելու օրակարգին, միջազգային հանրությանը կոչ է անում միջոցներ ձեռնարկել Ադրբեջանի ագրեսիվ կեցվածքը և գործողությունները կասեցնելու և դրա համար անհրաժեշտ միջազգային մեխանիզմներ գործարկելու ուղղությամբ։ Այս մասին ասված է Հայաստանի արտգործնախարարության հայտարարության մեջ՝ կապված Արցախում լարվածության հետ, որը հանգեցրել է հայկական կողմի մարդկային եւ տարածքային կորուստների։
Բաքուն հայտնել է մի քանի բարձունքների գրավման մասին, ինչը չի նշվում հայկական հաղորդագրություններում։ Բացի այդ, Բաքուն հայտարարել է «հակահաբեկչական գործողություններ այն գոտում, որտեղ ժամանակավորապես տեղակայված է ռուսական կոնտինգենտը»։
Եվ Հայաստանի արտգործնախարարությունը, և Արցախի ղեկավարությունը շարունակում են հղում անել ռուսական զորախմբին։ Իսկ Բաքվի անօդաչու սարքերն անարգել հարվածներ են հասցնում հայկական դիրքերին և չեն հանդիպում ռուսական կոնտինգենտի դիմադրությանը։
Հայաստանի ԱԳՆ-ն հիշեցրել է «այս տարվա մարտի 24-ին ադրբեջանական զինված ուժերի անօրինական առաջխաղացումը Փառուխ գյուղի ուղղությումբ, 2020 թվականի դեկտեմբերին 11-ին Խծաբերդ և Հին Թաղեր գյուղերի ուղղությամբ ձեռնարկված գրոհը, որոնք նույնպես գտնվում են Լեռնային Ղարաբաղում ՌԴ խաղաղապահ զորախմբի պատասխանատվության գոտում»։ Այս իրադարձություններին ռուսական կոնտինգենտի հակահայկական դերն անգամ բացատրելու կարիք չկա։
Ստացվում է, որ ռուս «խաղաղապահներն» Արցախում գտնվելու երկու տարիների ընթացքում չեն կարողացել կամ չեն ցանկացել ստեղծել հրադադարի ռեժիմի խախտումները եւ տխրահռչակ «եռակողմ հայտարարությունը» կանխող համակարգ։ Արցախի երկինքը փակ չէ ադրբեջանական անօդաչու թռչող սարքերի համար, ավելին, օկուպացված Ակնայում ստեղծվել է ռուս-թուրքական հետախուզական կենտրոն, որտեղից էլ ուղղորդվում են անօդաչու սարքերը, եւ ոչ առաջին անգամ։ Քաղաքական առումով Ռուսաստանը արգելափակում է և՛ ՄԱԿ-ի Անվտանգության խորհուրդը, և՛ ԵԱՀԿ Մինսկի խումբը՝ տորպեդահարելով կարգավորման բոլոր լեգալ ձևաչափերը։
Հայկական կողմը շարունակում է հղումները «խաղաղության օրակարգին», «եռակողմ հայտարարությանը» և ռուսական խաղաղապահ առաքելությանը որպես Արցախի անվտանգության երաշխիքներ։
Հայաստանի ԱԳՆ-ն խոսում է «միջազգային մեխանիզմների» մասին՝ չհստակեցնելով, թե կոնկրետ ինչի մասին է խոսքը։ Գործողությունների որոշակի հաջորդականություն կա՝ մեխանիզմների ակտիվացման համար նախ անհրաժեշտ է հայտարարել հայկական կողմին պարտադրված մեխանիզմների սպառվածության կամ աննպատակահարմարության մասին՝ հրաժարվել «խաղաղության օրակարգից», «եռակողմ հայտարարությունից» և Ռուսաստանի մենաշնորհից։
lragir.am