14 տարեկանում Անդրե Աղասին նվաճեց իր առաջին ազգային տիտղոսը` դառնալով պատանիների խմբում ԱՄՆ չեմպիոն։ Սակայն հայրը երբեք չէր դադարում որդուց պահանջել ավելին։ Ի դեպ, «Անկեղծ» ինքնակենսագրական գրքի առանցքային թեմաներից մեկը` Աղասիի և նրա հոր մշտական կոնֆլիկտն է։ Թենիսիստի հայրը բռնցքամարտիկ էր և որդու ծնվելու պահից երազում էր նրա հաջողակ մարզական կարիերայի մասին։ Տղայի համար ընտրելով մեծ թենիսի ճանապարհը` նա վերջինիս ստիպում էր 3 տարեկանից մարզումներին օրական չորս ժամ հատկացնել։

16 տարեկանում պատանուն ներառեցին պրոֆեսիոնալ թենիսիստների ցանկում։ Իսկ արդեն 18 տարեկանում Աղասին դարձավ աշխարհի երրորդ ռակետն ու ուժեղագույն խաղացողներից մեկը։ Հետագա կարիերայի ընթացքում հաղթեց 60 անհատական մրցաշարերում և դարձավ պատմության մեջ «Ոսկե սաղավարտի» առաջին մրցանակակիրը տղամարդկանց մեջ։

Մարզական հաջողություններից զատ՝ Աղասին հայտնի է նաև իր բարեգործական գործունեությամբ։ Աղասին երբեք Հայաստանում չի եղել, սակայն Twitter–ի իր էջում բազմիցս օգնել է Հայաստանին աջակցություն ցուցաբերող բարեգործական կազմակերպություններին, մասնակցել` Հայոց ցեղասպանությունը Թուրքիայի կողմից ճանաչելուն ուղղված ամբողջ աշխարհի հայերի կազմակերպած ֆլեշմոբերին։

Նյութի հեղինակ՝ Սեդա Բարսամյան

armpublic.com