Ինչ է սպասվում Հայաստան-Իրան սահմանին
Հուլիսի 7-ին Երևանում հանդիպել են Հայաստանի և Իրանի անվտանգության խորհրդի քարտուղարներ Արմեն Գրիգորյանն ու Ալի Շամխանին:
Երկու պաշտոնյաները քննարկել են երկկողմ տնտեսական գործակցությունն ու դրա կայուն զարգացմանը վերաբերող հարցեր: «Հայ-իրանական տնտեսական հարաբերությունների և հատկապես Սյունիքի զարգացման համատեքստում առանձնակի շեշտվել է Իրանի Չաբահար նավահանգստի կարևորությունը: Երկուստեք բարձր է գնահատվել կողմերի պատրաստակամությունը շարունակելու համագործակցությունը Մեղրու ազատ տնտեսական գոտու և Հյուսիս-հարավ ճանապարհային միջանցքի շրջանակներում», նշվում է հաղորդագրության մեջ:
Արմեն Գրիգորյանը Իրանի պաշտոնյային նաև տեղեկացրել է հայ-ադրբեջանական կարգավորման գործընթացը, շեշտելով, որ դրա շրջանակում չի քննարկվում միջանցքային տրամաբանության որևէ հարց: Իրանցի պաշտոնյան շեշտել է այդ գործընթացը երկրների տարածքային ամբողջության ու սահմանների անձեռնմխելիության հարգմամբ առաջ տանելու կարևորությունը: Իրանի անվտանգության խորհրդի քարտուղարի հայաստանյան այցն ու հանդիպումը անկասկած կապված է ռեգիոնալ ինտենսիվ դիվանագիտական անցուդարձի հետ, որ մասնավորապես ծավալվում է հայ-ադրբեջանական հակամարտության շուրջ:
Մասնավորապես, Մոսկվան վերջին օրերին մի քանի առիթով հայտարարել է, որ Հայաստանի և Ադրբեջանի դիրքորոշումները հաջողվել է մոտեցնել: Թե ո՞ր հարցում են դրանք մոտ, իսկ որ հարցում հեռու, գուցե այդ հանգամանքը փորձում է պարզել նաև Իրանը, հատկապես նկատելով թե մոսկովյան, թե բրյուսելյան աշխուժությունն ու նաև Միացյալ Նահանգների դինամիկ ուշադրությունը կովկասյան ռեգիոնի հանդեպ: Իրանի առանցքային խնդիրն անշուշտ լոկ Հայաստանի տարածքային ամբողջության ու սահմանի անձեռնմխելիության հանգամանքը չէ, որի խախտումը ռիսկ է նաև Թեհրանի համար: Իրանի համար ներկայումս ռիսկերն իհարկե ավելի լայն են և կապված են արդեն հենց Թեհրանի միջուկային ծրագրի շուրջ տեղի ունեցող գործընթացների հետ: Իրանի համար այդ առնչությամբ մի կողմից շատ կարևոր է հյուսիսային սահմանի կայուն իրավիճակն ու կառավարելի ընթացքը, մյուս կողմից իհարկե կարևոր է, որ այդ ընթացքը տեղի ունենա ոչ այնպիսի օրակարգով, որը ինքնին ռազմա-քաղաքական մարտահրավեր է Իրանի անվտանգությանը: Այդ ամենի համատեքստում, Հայաստանի և Իրանի ԱԽ քարտուղարների հանդիպման ուշագրավ դրվագ է այն, որ «Կողմերը պայմանավորվել են երկխոսությունը շարունակելու նպատակով հաջորդիվ հանդիպել Հայաստան-Իրան սահմանին», ինչպես նշվում է հաղորդագրության մեջ: Հազիվ թե այդ պայմանավորվածության նպատակը այսպես ասած իրանյան պաշտոնյաների ճանապարհի կրճատումը լինի՝ Հայաստանի պաշտոնյաների ճանապարհը երկարացնելու հաշվին: Եթե լուրջ, ապա Հայաստան-Իրան սահմանին հանդիպմանը երկխոսությունը շարունակելու պայմանավորվածությունը թերևս վկայում է սահմանին առնչվող առարկայական քննարկման և խոսակցության մասին, որի՝ թերևս դետալային շարունակությունը կլինի հայ-իրանական սահմանին:
Հեղինակ՝ ՀԱԿՈԲ ԲԱԴԱԼՅԱՆ
1in.am
Նմանատիպ Լուրեր
