Շնորհավո՛ր բոլորիս ամենակարևոր ու նշանակալի տոներից մեկը՝  Հայաստանի Առաջին Հանրապետության հիմնադրման տոնը։

Մայիսի 28-ին համայն հայությունը թե՛ Հայաստանում, թե՛ Արցախում և թե՛ Սփյուռքում տոնում է Հայաստանի Առաջին Հանրապետության օրը:

1918 թ –ի մայիսի 28-ը սկիզբը դարձավ այն հերոսական ուղու, որով պիտի սլանար ու մայիսյան նոր հերոսամարտերով իր ազատ ու անկախ կենսագրությունը կնքեր հայ ժողովուրդը։ 

Հայ ժողովրդի կողմից անկախ պետականությունը վերականգնելու դարավոր երազանքն ի կատար ածվեց հենց 1918 թվականի մայիսի 28-ին՝ դառնալով հայոց պետականության վերածննդի խորհրդանիշը։ Եվ հենց 1918-ի մայիսի 28-ին Հայոց ազգային խորհուրդը Թիֆլիսում հայտարարեց անկախ Հայաստանի Հանրապետության ստեղծման մասին:

Թուրքական բանակի դեմ տարած մայիսյան հաղթանակները Սարդարապատում, Բաշ Ապարանում, Ղարաքիլիսայում փրկեցին Արևելյան Հայաստանի վերջին հողակտորները և դրանց վրա ապրող հայությանը, և մեր ժողովուրդը մեծագույն ճիգով վերականգնեց Հայոց անկախ պետականությունը՝ հռչակելով Հայաստանի առաջին հանրապետության ծնունդը:

Հայաստանի Առաջին Հանրապետության ծնունդը Հայոց պատմության շրջադարձային էջերից է: Բագրատունյաց Հայաստանի անկումից շուրջ 1000 և Կիլիկյան Հայաստանից 600 տարի անց ստեղծվում էր անկախ Հայաստան: Չլիներ Առաջին Հանրապետությունը, հավանաբար չէին լինի խորհրդային և մեր օրերի Հայաստանները:

900 տարի այս տարածքում Հայաստանը չէր ունեցել պետականություն: 900 տարի անց պետականության վերականգնումը հսկայական նշանակություն ունեցավ հայ ժողովրդի համար: Եվ հենց Առաջին Հանրապետությունն է, որ հայկական պետական մտածողության, հայապահպանության և ազգի ամրապնդման սկիզբ դրեց: Գուցե և այլ հնագույն ազգերի պես կվերանար հայությունը, սակայն մայիսի 28-ն, իսկապես, փոխեց մեր բոլորի ճակատագիրը` տալով հնարավորություն մեծանալ սեփական Երկրում, կերտել սեփական Պետություն…

Թեև իր երկամյա, կարճ գոյությանը,  Առաջին հանրապետությունըծնեց պետական մտածողություն, դարձավ հայապահպանության

և ազգի շարունակականության կենսական գործոնը 

1918-ի մայիսի 28-ի շնորհիվ է նաև, որ մենք այսօր ունենք  անկախ հայրենիք` Հայաստանի Երրորդ Հանրապետությունը:

Հայաստանի առաջին հանրապետության հիմքի վրա հետագայում ձևավորվեցին այն նախադրյալները, որոնք 1991-ին բերեցին նոր անկախության ու նոր հաղթանակների:

Շնորհավոր Մայիսի 28-ը՝ Հայաստանի առաջին հանրապետության 104-ամյակը:

Կեցցե՛ Մայիսի 28-ը՝ Հայոց պետականության վերականգնման օրը Կեցցե՛ համայան հայ ժողովուրդը ի Հայաստան, ի Սփյուռս աշխարհի և աննկուն ու հպարտ՝ Արցախահայության:

<<Հայ Մշակութային Հասարակական Ֆորում>>

<<Ս․ Մարիամ Աստվածածին Բարեգործական Կենտրոն>>

<<Հայազդ>> լրատվական կայքի Խմբագրություն