Հայ Մարզամշակութային «Րաֆֆի» համալիրում տեղի ունեցավ Հայոց Ցեղասպանության նահատակների ոգեկոչման միջոցառում
2022 թվականի մայիսի 13-ին Հայ Մարզամշակութային «Րաֆֆի» համալիրում տեղի ունեցավ Հայոց Ցեղասպանության նահատակների ոգեկոչման միջոցառում: Միջոցառումը նախաձեռնել էր համալիրի մշակությաին բաժինը՝ մյուս բաժանմունքերի օժանդակությամբ: Պատրաստվել էր գեղեցիկ բեմ օրվա կապակցությամբ:
Միջոցառմանը ներկա էին՝ ԻԻՀ Խորհրդարանի հայ պատգամավոր Պրն. Արա Շահվերդյանը, Հայ Մշակութային Հասարակական Ֆորումի և Մարիամ Աստվածածին Բարեգործական Կենտրոնի ներկայացուցիչները, Թեմական Խորհրդի, տարբեր միությունների ներկայացուցիչներն ու համայնքի բազմաթիվ անդամներ:
Ծրագիրը սկսվեց «Հայր Մեր»-ով, այնուհետև բացման խոսքով հանդես եկավ օր. Լիլիթ Սարդարյանը, որը անդրադարձավ ցեղասպանության պատմական որոշ հարցերին ու նաև Հայաստանի ներկայիս անցուդարձերին, նշեց. «ներկայումս մենք ունենք Հայաստան երկիր իր պետականությամբ ու պետական կառույցներով: Վերոհիշյալ հարցերի լուծման երաշխիքը կարող է լինել մեր հզոր և զարգացած Հայաստանը: Մենք սփյուռքահայերս ողջունում ենք ներկայիս իշխանության արտաքին քաղաքականությունը, որը նպատակ ունի երկարատև խաղաղություն ապահովել հայ ժողովրդի համար»:
Այնուհետև միջացառման գեղարվեստական բաժնում ասմունքով հանդես եկավ միության փոքրիկ անդամ Մոնթե Դիլանչյանը, երկու գեղեցիկ երգ կատարեց Նարե Դարուսին, ասմունքեց Լիոնա Շահնազարյանը: Մի քանի երգերով հանդես եկավ համալիրի «Մեղեդի» երգչախումբը՝ պրն. Համլեթ Խաչատրյանի ղեկավարությամբ: Հնչեց նաև Պրն. Համլեթ Խաչատրյանի մեներգը: Հանդես եկավ նաև համալիրի «Գարուն» պարախումբը մի քանի գեղեցիկ պարային կատարումներով՝ գեղարվեստական ղեկավար Տիկ. Կարինե Պետրոսյանի ու փորձավար՝ Լիոնա Շահնազարյանի գլխավորությամբ:
Ռուբիկ Սարդարյան