Մոսկվայում Փաշինյանին պարտավորեցնող փաստաթուղթ են առաջարկել, որը նա չի ստորագրել
Արտաքին գործերի նախարար Արարատ Միրզոյանն այցելել է Հնդկաստան, որտեղ խոսել է հաղորդակցությունների խոշոր նախագծերի և Մումբայ նավահանգստի օգտագործման մասին։ Հայաստանում Իրանի դեսպանը հայտարարել է «Զանգեզուրի միջանցքի» անթույլատրելիության մասին, իսկ մինչ այդ ԻՀՊԿ-ի հրամանատարությունը զգուշացրել էր, որ թույլ չի տա փոխել տարածաշրջանի երկրների «տարածքային ամբողջականությունը»։ Հնդկաստանից վերադառնալով՝ Միրզոյանը մեկնել է ԱՄՆ, որտեղ ստորագրվել է խաղաղ ատոմի ոլորտում համագործակցության ռազմավարական պայմանագիր։ Իսկ ռազմավարական երկխոսության հերթական փուլի արդյունքներով համատեղ հայտարարություն է արվել գործընկերության մասին, այդ թվում՝ անվտանգության և պաշտպանության ոլորտում։ Մինչ այս ԱՄՆ պետքարտուղար Բլինքենը պահանջ էր ներկայացրել Ադրբեջանին և Հայաստանին՝ քայլեր չձեռնարկել պատերազմը վերսկսելու համար։
Այս իրադարձությունները նկատելի անհանգստություն են առաջացրել Ռուսաստանում և Թուրքիայում։ Թուրքիայի արտաքին գործերի նախարար Չավուշօղլուն, մասնավորապես, նշել է, որ Հայաստանն ու Թուրքիան պետք է «հստակեցնեն սահմանները»։ Իր հերթին, իշխանության մոտ աղբյուրները տեղեկություններ են տարածում, որ Մոսկվայում Փաշինյանին պարտավորեցնող փաստաթուղթ են առաջարկել, որը նա չի ստորագրել, եւ դրանով են պայմանավորված ռուսամետ «ընդդիմության» գործողությունները Հայաստանում, որոնք, իբր, պետք է թույլ չտան Փաշինյանին դուրս գալ ռուսամետ ուղուց։
Մինչ «ընդդիմությունը» խորհրդարանում պահանջում էր Փաշինյանի հրաժարականը, Թբիլիսիում էին ՀՀ Անվտանգության խորհրդի քարտուղարն ու Հայաստանի պաշտպանության նախարարը։ Ստորագրվել է 2022 թվականի պաշտպանության ոլորտում համագործակցության պլան։ Կողմերն անդրադարձել են Ուկրաինայում տիրող իրավիճակին՝ նշելով, որ դա «էապես փոխում է համաշխարհային անվտանգության ճարտարապետությունը, այդ թվում՝ Հարավային Կովկասում»։ Վրաստանի վարչապետն իր հերթին առաջարկել է «Խաղաղ հարեւանությունը»՝ որպես տարածաշրջանային երկխոսության կարեւոր հարթակ։
Ավելի վաղ Վրաստանի արտաքին գործերի նախարարն այցելել էր Բաքու և Երևան։ Աշխարհաքաղաքական արագ փոփոխվող միջավայրում կարևոր է ամրապնդել մեր երկրների միջև բարեկամական հարաբերությունները, ապրիլի 30-ին Երևանում հայտարարել է Վրաստանի արտգործնախարար Իլյա Դարչիաշվիլին։ Ընդգծվել է, որ կողմերը կնպաստեն տարանցիկ նոր նախագծերին՝ հաշվի առնելով երկու երկրների ռազմավարական նպատակներն ու խնդիրները։
Կարելի՞ է արդյոք այս քայլերը համարել անվտանգության նոր միջավայրի ձեւավորման նախանշան։
lragir.am