Երևանում Արցախյան պատերազմների զոհերի հիշատակին նվիրված պուրակի նախագիծը վերջնական պատրաստ կլինի մայիսին
Երևանի Բուսաբանական այգու տարածքում Արցախյան պատերազմների ընթացքում զոհվածների հիշատակին նվիրված պուրակի նախագիծը վերջնական պատրաստ կլինի մայիսին: «Արմենպրես»-ի հետ զրույցում այս մասին նշեց «Երևան նախագիծ» ՓԲԸ-ի տնօրեն Սիրեկան Օհանյանը:
«Ծրագիրը նախագծային փուլում է: Նախագծով նախատեսվում է հետևյալը: Բուսաբանական այգու բարձր հատվածում՝ բլրի վրա, լինելու է հուշակոթող: Հիմա մենք աշխատում ենք այդ վայրի՝ հուշահարթակի ու շրջակա տարածքի բարեկարգման ուղղությամբ: Նախատեսվում է վերակառուցել բուսաբանական այգում գտնվող հուշահարթակի տարածքը: Այնտեղ արդեն կան հատակագծային լուծումներ, սակայն վերջնական արդյունքում լինելու է այնպես, որ ծառուղիները, որոնք կապված են բլրին, ոլորապտույտներով բարձրանան գագաթ: Հուշահարթակի հետ կապված աշխատանքների ավարտից հետո կանցկացվի նախագծային մրցույթ արդեն բուն հուշակաթողի նախագծման համար: Մենք նախնական բոլոր աշխատանքները կանենք հարթակի հետ կապված, որ մնա հուշակոթողի մրցույթի իրականացումը»,-ասաց Սիրեկան Օհանյանը:
«Երևան նախագիծ» ՓԲԸ-ի տնօրենը տեղեկացրեց, որ կլինի խմելու, ոռոգման ջրի ենթակառուցվածքների բարելավման անհրաժեշտություն: Ամբողջ այգու տարածքը պետք է ապահովվի ոռոգման համակարգով: Դրա համար աշխատանք է տարվում նոր ոռոգման ջրագծի կառուցման նախագծի ուղղությամբ: Այն կապահովի անհրաժեշտ ջրի մատակարարումը:
Նախատեսվում է նոր մուտք Ծարավ Աղբյուրի փողոցի կողմից: Կկառուցվի մոտ 200 ավտոմեքենայի համար նախատեսված ավտոկայանատեղի: Մուտքի մոտ կլինի այցելուների սպասարկման տաղավար: Պուրակի այն հատվածում, որտեղ թեքությունը շատ չէ, կնախատեսվի հեծանվային ուղի: Ծառուղիները լուսավորվելու են գեղեցիկ լուսավորությամբ, կլինեն համապատասխան նստարաններ, աղբամաններ: Այսինքն՝ բոլոր հնարավոր ենթակառուցվածքները պուրակի հետ կապված կլինեն: Տեղում գոյություն ունի աստիճանաձև բուլվար, որը կվերականգնվի ծաղկային ձևավորումներով:
Պուրակի նախագծային ընդհանուր տարածքը 30 հա է: Թե որքան ծառ կտնկվի, Սիրեկան Օհանյանը դժվարացավ պատասխանել: Նրա խոսքով, այժմ հստակեցնում են այն հատվածները, որտեղ կարվեն սանիտարական էտումներ: Այնուհետև այգու տնօրինության կողմից կներկայացվեն ծառատեսակների առաջարկներ: Սիրեկան Օհանյանը նշեց, որ այգու կանաչապատ հատվածներն այնպես չէ, որ բավարար վիճակում են, հետևաբար կանաչապատումը, ծառերի տնկումը ամբողջական պետք է դիտարկել:
«Այս տարի ամբողջ ծրագրի նախագծային ժամկետը մայիսին կավարտվի: Տրամաբանական է, որ դրանից հետո մրցույթ կհայտարարվի շինարարության համար: Վերջնական արդյունքում ունենալու ենք ժամանակակից լուծումներով հուշապուրակ, ապրելու այգի, որի բովանդակությունը լինելու է հետևյալը՝ կյանքը շարունակվում է, ոչ ոք չի մոռացվում: Կյանքով լեցուն պուրակ ենք ունենալու»,-հավելեց Սիրեկան Օհանյանը:
ՀՀ վարչապետ Նիկոլ Փաշինյանը հայտնել է, որ Երեւանի բուսաբանական այգում հիմնադրվելու է Կյանքի պուրակ, որտեղ Արցախյան բոլոր պատերազմների բոլոր զոհերի կենդանությունն ու ներկայությունը խորհրդանշող ծառեր կտնկվեն, իսկ պուրակի կուլմինացիան կլինի Կենաց ծառը: «Դա չի լինելու հուշակոթող, դա լինելու է կենաց պուրակ, որտեղ վազվզելու, աղմկելու, խաղալու են երեխաները, երիտասարդները ժամանակ են անցկացնելու, մեծահասակները ճեմելու են ու զրուցելու, և այդ պուրակը լինելու է նրա մասին, որ ահա այդ բոլոր մարդկանց, այս բոլոր մարդկանց՝ Հայաստանի ու Արցախի ապրելու համար են զոհվել նրանք: Եվ Հայաստանի ապրելը, Արցախի ապրելը, խաղաղ ու զարգացող հայոց պետականությունը պիտի դառնա այն հաղթանակը, որ նրանք կերտեցին»,-նշել է վարչապետը:
Աննա Գզիրյան